Այսօր Հայաստանի ազգային գրադարանը հյուրընկալեց Վրաստանի Իլյա Ճավճավաձեի անվան ազգային գրադարանի պատվիրակությանը։ Պատվիրակության կազմում էին Վրաստանի ազգային գրադարանի տնօրեն Կոնստանտին Գամսախուրդիան, գրադարանային ռեսուրսների վարչության ղեկավար Լևան Թաքթաքիշվիլին և գրացուցակավորման բաժնի ղեկավար Բեկա Ղաժոնիան։ Այցը նշանավորվեց հայ-վրացական գրադարանային և մշակութային համագործակցության ընդլայնման մի շարք կարևոր նախաձեռնություններով։

Միջոցառման առանցքային կետը Հայաստանի ազգային գրադարանի և Վրաստանի Իլյա Ճավճավաձեի անվան ազգային գրադարանի միջև Համագործակցության հուշագրի ստորագրումն էր։ Այս փաստաթուղթն ամրագրեց կողմերի պատրաստակամությունը՝ ընդլայնելու փոխգործակցությունը, կազմակերպելու փոխայցելություններ, իրականացնելու մասնագիտական փորձի փոխանակում և համատեղ ծրագրեր։ՀԱԳ Ընդհանուր ընթերցասրահում հանդիսավորությամբ բացվեց Վրացական գրականության անկյունը, որը կոչված է նոր հարթակ ձևավորելու երկու երկրների գրադարանների և մշակութային հաստատությունների միջև։

Հանդիպման շրջանակում տեղի ունեցավ նաև «Վրացական գրական ժառանգությունը Հայաստանի ազգային գրադարանում. 1783-2025 թթ.» խորագրով ցուցադրության բացումը։ Ցուցադրությունում ներկայացվեցին Հայաստանի ազգային գրադարանի հավաքածուներում պահվող վրացերեն արժեքավոր հրատարակություններ և գրական թարգմանություններ։ Ցուցադրության նպատակն էր համապարփակ ներկայացնել Հայաստանի ազգային գրադարանի հավաքածուներում առկա վրացական գրականությունը և շեշտել հայ-վրացական մշակութային կապերի պատմական կայունությունը և շարունակականությունը։ Այս հանդիպումը և ձեռք բերված պայմանավորվածությունները կարևոր քայլ են Հայաստանի և Վրաստանի գրադարանների միջև կապերի ամրապնդման և մշակութային ժառանգության պահպանման ու տարածման գործում։