Հայաստանի ազգային գրադարանի Համագործակցության և գրքափոխանակության բաժնի վարիչ Մայա Հայրապետյանը և Սպասարկման բաժնի վարիչ Տաթևիկ Թամազյանը հոկտեմբերի սկզբին հյուրընկալվել էին Շիրակի մարզային գրադարանում։ Այցի նպատակը մարզային գրադարանը և 6 համայնքային գրադարաններ 347 միավոր գրականությամբ համալրելն էր, ինչպես նաև՝ Շիրակի մարզային գրադարանում արդեն երկրորդ տարին գործող էլեկտրոնային սպասարկման վերաբերյալ մարզային գրադարանի աշխատակիցներին խորհրդատվություն տալը։

Տաթևիկ Թամազյանը, էլեկտրոնային սպասարկումն ավելի հեշտ կազմակերպելու և որոշակի խնդիրներ լուծելու նպատակով տեղում որոշ կարգավորումներ է արել։ Ընթերցողների համար բացվել է առցանց պատվեր կատարելու հնարավորությունը։ Թամազյանը քայլ առ քայլ ցույց է տվել պատվեր կատարելու և սպասարկելու ընթացքը և՛ ընթերցողի, և՛ գրադարանավարի տեսանկյունից։

Գործուղման ընթացքում Ազգային գրադարանի աշխատակիցներն այցելել են նաև Շիրակի Միքայել Նալբանդյանի անվան համալսարանի գրադարան՝ նվիրաբերելով մասնագիտական 40 միավոր գրականություն։ ՀԱԳ հրատարակած «Եղիշե Չարենց։ Մատենագիտություն (1914-2022)» գիրքը ՀԱԳ աշխատակիցները նվիրել են Ավ. Իսահակյանի և Հովհ. Շիրազի տուն-թանգարաններին։