Հայաստանի ազգային գրադարանում Ազգային գրադարանային շաբաթը մեկնարկեց գրադարան ՀՀ ՊՆ Վազգեն Սարգսյանի անվան ռազմական ակադեմիայի կուրսանտների այցելությամբ։ Ազգային գրադարանի տնօրեն Աննա Չուլյանի ուղեկցությամբ նրանք շրջայց կատարեցին գրադարանի թամանյանական մասնաշենքում, եղան ընդհանուր ընթերցասրահում։

Շրջայցը շարունակվեց Գրատպության թանգարանում, որտեղ կուրսանտները ծանոթացան հայ գրատպության պատմությանը, նշանավոր տպագրիչների թողած ժառանգությանը։ Կուրսանտները, ընթերցողական տոմսեր ստանալով, դարձան մեր գրադարանի ընթերցողները։

Թամանյանական շենքի նախագահական դահլիճում համագործակցության հուշագիր ստորագրվեց Հայաստանի ազգային գրադարանի և Վազգեն Սարգսյանի անվան ռազմական ակադեմիայի միջև։ Հուշագիրը ստորագրեցին գրադարանի տնօրեն Աննա Չուլյանը և ռազմական ակադեմիայի պետ, գնդապետ Արսեն Մանգասարյանը։