Հայաստանի ազգային գրադարանի «Հանրային դասախօսութիւններ» շարքի այսօրուան նիւթը լրագրութիւնն էր։ Լրագրող, լրատուական փորձագէտ Մարկ Գրիգորեանը լրագրութեան դաշտէն ներս իր հարուստ փորձը ներկայացնելով խօսեցաւ խորհրդային մամլոյ համակարգէն դէպի բազմաբովանդակ միջազգային մամլոյ անցման գործընթացին մասին։ Մասնաւորապէս անդրադառնալով բրիտանական յառաջատար թերթերու՝ The Guardian, The Sun, The Times, The Telegraph, The Independent օրինակներուն՝ ան ներկայացուց անոնց բովանդակային քաղաքականութիւնը, լրագրողական մշակոյթը եւ առանձնայատկութիւնները։ Դասախօսութեան ընթացքին խօսուեցաւ նաեւ խորհրդային մամլոյ մէջ տարածուած «բուրգ» կառուցուածքի մասին, որ երկար ժամանակ լրագրողական նիւթ կառուցելու ընդունուած ձեւ համարուած է։ Մարկ Գրիգորեանը նշեց, որ այսօր այդ ձեւաչափը մասամբ պահպանուած է որոշակի շրջանակներէ ներս, սակայն ժամանակակից լրագրութեան պահանջները զգալիօրէն փոխուած են։

Բացի մեթոտաբանական հարցերէն, բանախօսը պատմեց իր անձնական փորձառութեան հետաքրքրական դրուագներուն մասին։ Մասնագիտական գործունէութիւնը սկսած է 1993 թուականին՝ որպէս «Սուոպոտա» թերթի խմբագրի տեղակալ։ 1995-1996 թուականներուն աշխատած է AIM (Armenian International Magazine) ամսագրին մէջ։ Տարիներու ընթացքին համագործակցած է Հայաստանի եւ արտերկրի բազմաթիւ լրատուամիջոցներու հետ։ Ան 16 գրքի հեղինակ եւ խմբագիր է, բազմաթիւ գիտական եւ լրագրողական յօդուածներու հեղինակ։ Հեղինակը իր գիրքերէն մի քանին նուիրեց Ազգային գրադարանին։

Երկար տարիներ աշխատած է Լոնտոնի BBC-ի ռուսական ծառայութեան մէջ՝ յատկապէս «Վաղ ժամ» եւ «Պիպիսեւա» ծրագիրներու շրջանակէն ներս Սեւա Նովկորոտցեւի հետ։ Միջոցառման աւարտին մասնակիցներուն հետ ծաւալուեցաւ բովանդակային քննարկում՝ թէ՛ լրագրութեան բարոյագիտութեան, թէ՛ լրատուական միջավայրի ձեւաւորման գործընթացներու վերաբերեալ։