Այս տարի նշվում է ՀՀ ժողովրդական արտիստ, դերասան, սցենարիստ և ռեժիսոր Երվանդ Մանարյանի ծննդյան 100-ամյակը։ Նոյեմբերի 7-ին Հայաստանի ազգային գրադարանի արվեստի բաժնի ընթերցասրահում սիրված դերասանին նվիրված ցերեկույթ էր կազմակերպվել։ Միջոցառման մասնակիցներն ունկնդրեցին գրադարանի արվեստի բաժնի վարիչ Հասմիկ Առաքելյանի խոսքը, որն ուղեկցվում էր սիրված արվեստագետի կյանքի ճանապարհը ներկայացնող արխիվային լուսանկարներով և տեսանյութերով։ Ընթերցասրահում ցուցադրված էին Երվանդ Մանարյանի մասին գրքեր, ալբոմներ, պարբերական մամուլում լույս տեսած հոդվածներ։

Երվանդ Մանարյանի մասին ներկաներին ուշագրավ ու մտերմիկ հուշեր պատմեց նրա որդին՝ Քրիստ Մանարյանը։ Անգնահատելի են Երվանդ Մանարյանի ծառայությունները։ Նա հայ տիկնիկային արվեստը բարձրացրել է զարգացման մի նոր աստիճանի և այն դուրս բերել միջազգային ասպարեզ, որի շնորհիվ Երևանի տիկնիկային թատրոնը դասվել է աշխարհի 10 լավագույն թատրոնների շարքը։

Երվանդ Մանարյանը մեծ էր ոչ միայն իբրև դերասան, բեմադրիչ, կինոսցենարիստ, այլև իբրև իսկական մտավորական: