Մարտիրոս Սարյան, Հակոբ Կոջոյան, Միքայել Արուտչյան, Տաճատ Խաչվանքյան… Արվեստագետների մի ամբողջ համաստեղություն էր ներգրավվել գրահրատարակչական ոլորտում՝ Հայպետհրատի գեղարվեստական բաժնի վարիչ Եղիշե Չարենցի նախաձեռնությամբ: 

Հայաստանի ազգային գրադարանի ընթերցողները, հյուրերը, այցելուները բացառիկ հնարավորություն ունեցան հաղորդակցվելու նախորդ դարի երեսունականների գրական-հրատարակչական ոգուն, մեծն Չարենցի խմբագրությամբ ու հայ մեծանուն նկարիչների նկարազարդումներով հրատարակված շատ գրքերի առաջին օրինակներին: 

Թամանյանական փոքր ցուցասրահում գրքային ձևավորումների ցուցադրության առիթը գրադարանի կազմակերպած «Հեքիաթը Մարտիրոս Սարյանի արվեստում և հայկական հեքիաթների սարյանական նկարազարդումները» խորագրով հանրային դասախոսությունն էր: 

Ազգային գրադարանի ցուցադրության բացառիկ արժեքը հավաստեցին նաև Հայաստանի ազգային պատկերասրահի ցուցահանդեսի համադրողներ Հայկուհի Սահակյանն ու Սեդա Խանջյանը: Գրքարվեստի, գրքային ձևավորումների մասնագետ, մեծ նկարիչ Գրիգոր Խանջյանի դուստր Սեդա Խանջյանը գոհունակությամբ նշեց, որ իր համար բացահայտում էին որոշ գրքերի ձևավորումներ, մասնավորապես Ակսել Բակուցի «Անձրևը»՝ Հակոբ Կոջոյանի և Գեղամ Սարյանի «Միջօրեն»՝ Հովհաննես Շավարշի ձևավորմամբ: Ցուցահանդեսը գրադարանում գործեց ավելի քան մեկ ամիս, որի ընթացքում հարյուրավոր այցելուներ հնարավորություն ունեցան առնչվել հայ հրատարակչական արվեստի անցյալ դարի լավագույն նմուշների հետ։