2023թ. մարտի 31-ին Հայաստանի ազգային գրադարանում տեղի ունեցավ գրական ցերեկույթ՝ նվիրված Հայաստանի առաջին հանրապետության լուսավորության և արվեստի նախարար, մեծանուն հասարակական գործիչ, հրապարակախոս, գրականագետ և մանկավարժ Նիկոլ Աղբալյանի ծննդյան 150-ամյակին։ Գրադարանի ընդհանուր ընթերցասրահի առաջատար գրադարանավար Գոհար Ենոքյանը ներկայացրեց Նիկոլ Աղբալյանի կյանքը և գործունեությունը։ 

Միջոցառման պատվավոր հյուրն էր նաև գրականագետ, բանասիրական գիտությունների դոկտոր, պրոֆեսոր, ՀՀ գիտության վաստակավոր գործիչ, Հայաստանի գրողների միության անդամ Սամվել Մուրադյանը, որն ընդարձակ ելույթ ունեցավ՝ ներկայացնելով Նիկոլ Աղբալյանի գրական վաստակը։ Մասնավորապես պրոֆեսոր Մուրադյանը ներկայացրեց Աղբալյանի ներդրումը 1910-ական թվականներին Թիֆլիսում Սայաթ Նովային նվիրված վարդատոների ավանդույթի սկզբնավորման և հայ միջնադարյան ամենանշանավոր սիրերգուի երգերի ժողովրդականացման, Եղիշե Չարենցի գրական մուտքն ազդարարելու և այլ անուրանալի ծառայությունների համար։ 

Միջոցառման ավարտին ներկաները ծանոթացան ՀԱԳ թամանյանական Մեծ ցուցասրահում ցուցադրված աշխատություններին, ժողովածուներին, մեծանուն հայի կյանքի և գործունեության մասին գրված գրքերին, պարբերականներում լույս տեսած հոդվածներին։ Ցուցահանդեսում ներկայացված է 36 գիրք, 2 առանձնատիպ, 27 հանդես և ամսագիր, 9 թերթ, որոնց աշխատակցել է Նիկոլ Աղբալյանը։ Ցուցահանդեսը կգործի մինչև ապրիլի 14-ը։