Դեկտեմբերի 6-ին Հայաստանի ազգային գրադարանում տեղի ունեցավ գրական ցերեկույթ՝ նվիրված բանաստեղծ, արձակագիր, ՀԽՍՀ մշակույթի վաստակավոր գործիչ, ՀԽՍՀ պետական մրցանակի դափնեկիր Մկրտիչ Սարգսյանի ծննդյան 100-ամյակին։

Գրական հանդիսությունը սկսվեց գրողի մասին ֆիլմի ցուցադրությամբ: Գրողի անցած ուղու մասին խոսք ասացին գրականագետ, դոկտոր-պրոֆեսոր Սամվել Մուրադյանը, «Հայկական հանրագիտարան հրատարակչության» գլխավոր խմբագիր-տնօրեն Հովհաննես Այվազյանը, գրադարանագետ Ռաֆիկ Ղազարյանը, ԳԱԱ պատմության ինստիտուտի տնօրեն, ակադեմիկոս Աշոտ Մելքոնյանը և ուրիշներ։

Մկրտիչ Սարգսյանի ստեղծագործություններից ընթերցեց Գայանե Սամվելյանը: Ելույթ ունեցողները հիշարժան դրվագներ պատմեցին գրողի կյանքից ու գործունեությունից: Հոբելյանի առիթով գրադարանի թամանյանական մեծ ցուցասրահում ներկայացված են Մկրտիչ Սարգսյանի անձնական իրերից, լուսանկարներ, գրողի հեղինակած, կազմած, խմբագրած գրքերը, ինչպես նաև նրան նվիրված մենագրություններ, նրա գրքերի թարգմանությունները։

Միջոցառումն անփոփեցին գրողի որդիները, որոնք շնորհակալություն հայտնեցին Հայաստանի ազգային գրադարանին ՝ միջոցառումը կազմակերպելու համար: «Հայաստան» հրատարակչության տնօրեն Վահագն Սարգսյանը շուրջ 100 միավոր գիրք նվիրեց Ազգային գրադարանին՝ հանրապետության մարզային և համայնքային գրադարաններին փոխանցելու համար: