Դեկտեմբեր 6-ին Հայաստանի ազգային գրադարանին մէջ տեղի ունեցաւ գրական երեկոյ՝ նուիրուած բանաստեղծ, արձակագիր, ՀԽԸՀ մշակոյթի վաստակաւոր գործիչ, ՀԽԸՀ պետական մրցանակի դափնեկիր Մկրտիչ Սարգսեանի ծննդեան 100-ամեակին։

Գրական հանդիսութիւնը սկսաւ գրողին մասին ֆիլմի ցուցադրութեամբ։ Գրողին անցած ուղիին մասին խօսք առին գրականագէտ, դոկտոր-փրոֆեսոր Սամուէլ Մուրատեանը, «Հայկական հանրագիտարան հրատարակչութեան» գլխաւոր խմբագիր-տնօրէն Յովհաննէս Այուազեանը, գրադարանագէտ Ռաֆիկ Ղազարեանը, ԳԱԱ Պատմութեան հիմնարկի տնօրէն, ակադեմիկոս Աշոտ Մելքոնեանը եւ ուրիշներ։

Մկրտիչ Սարգսեանի ստեղծագործութիւններէն ընթերցեցաւ Գայիանէ Սամուէլեանը։ Ելոյթ ունեցողները յիշարժան դրուագներ պատմեցին գրողին կեանքէն ու գործունէութենէն։ Յոբելեանին առթիւ գրադարանի թամանեանական մեծ ցուցասրահին մէջ ցուցադրուած են Մկրտիչ Սարգսեանի անձնական իրերէն, լուսանկարներ, գրողին հեղինակած, կազմած, խմբագրած գիրքերը, ինչպէս նաեւ անոր նուիրուած մենագրութիւններ, անոր գիրքերուն թարգմանութիւնները։

Միջոցառումը եզրափակեցին գրողին որդիները, որոնք շնորհակալութիւն յայտնեցին Հայաստանի ազգային գրադարանին՝ միջոցառումը կազմակերպելու համար։ «Հայաստան» հրատարակչութեան տնօրէն Վահագն Սարգսեանը շուրջ 100 միաւոր գիրք նուիրեց Ազգային գրադարանին՝ հանրապետութեան մարզային եւ համայնքային գրադարաններուն փոխանցելու համար։