Այսօր Ազգային գրադարանի տնօրեն Աննա Չուլյանը Հանրային հեռուստաընկերության առաջին ալիքի «Առավոտ լուսո» ծրագրի հյուրն էր: Հաղորդավար Ռուբեն Մուրադյանի հետ հարցազրույցում Աննա Չուլյանը ամփոփեց 2024 թվականի արդյունքները, անդրադարձավ տարվա ամենագլխավոր իրադարձությանը՝ «Ժառանգության պահպանություն հանուն կայուն ապագայի» երկրորդ միջազգային գիտաժողովին, գիտաժողովի արդյունքներին և արձագանքներին, գրադարանի աճող միջազգային հեղինակությանը:

Հետաքրքիր զրույց ծավալվեց գրադարանային ոլորտի հիմնախնդիրների և մարտահրավերների շուրջ: Աննա Չուլյանը խոսեց գրադարանի հաջողությունների մասին, անդրադարձավ թվայնացման աշխատանքներին և նշեց, որ 2024 թվականին գրադարանն ավելի քան կես միլիոն էլեկտրոնային տացք է ունեցել է, որի 90 տոկոսը կազմել են «Հայ գիրք» և «Հայ մամուլ» շտեմարանից օգտվողները:

Գրադարանի համար 2025 թվականը նույնպես հագեցած է լինելու տարբեր ծրագրերով և միջոցառումներով: Ապրիլի վերջին գրադարանում տեղի կունենա «Ֆրանսիա-Հայաստան. դիվանագիտական և միջմշակութային փոխառնչություններ» միջազգային գիտաժողովը, որին բազմաթիվ ճանաչված գործիչներ և գիտնականներ են մասնակցելու:

Առաջարկում ենք 15 րոպե ժամանակ հատկացնել և դիտել Աննա Չուլյանի հարցազրույցը: