Հայաստանի ազգային գրադարանը համալրվել է երկու արժեքավոր հայագիտական հրատարակություններով։ Մեծի Տանն Կիլիկիո Կաթողիկոսության «Կիլիկիա» Մատենադարանի մատենադարանապետ, Գերաշնորհ Տեր Շահան Արքեպիսկոպոս Սարգիսյանը Հայաստանի ազգային գրադարանին նվիրել է «Հասկ» հայագիտական տարեգրքի Նոր Շրջան, ԺԴ (2024–2025) թիվ հատորը։ Հայագիտական բարձրարժեք ուսումնասիրություններ ընդգրկող այս ծավալուն (647 էջ) հրատարակությունը լույս է տեսել Ն.Ս.Օ.Տ.Տ. Արամ Ա Կաթողիկոսի օրհնությամբ և խմբագրվել է Գերաշնորհ Տեր Շահան ԱրքեպիսկոպոսՍրբազանի կողմից։

Տարեգիրքը ներառում է Հայաստանի և Սփյուռքի հայագետների 25 գիտական ուսումնասիրություններ, որոնք խմբված են հետևյալ թեմատիկ բաժիններով՝

•Նիկեայի Ա տիեզերական ժողով 1700-ամյակ

• Հայոց ցեղասպանության 110-ամյակ,

• Մատենագրություն, արխիվ և պատմություն,

• Երաժշտական ավանդույթներ ու հարցադրումներ։

Տարեգրքի նոր հատորը նվիրված է Ն.Ս.Օ.Տ.Տ. Արամ Ա Կաթողիկոսի հայրապետական գահակալության 30-ամյակին և ընդգծում է Կաթողիկոսության բազմաշերտ հայագիտական առաքելությունը։ Մյուս արժեքավոր հրատարակությունը Ն.Ս.Օ.Տ.Տ. Արամ Ա Սրբազնագոյն Վեհափառ Հայրապետի գահակալության 30 տարիների առաքելական գործունեությանը նվիրված պատկերագիրքն է։Երկլեզու (հայերեն, անգլերեն) այս ծավալուն աշխատությունը (ավելի քան 400 էջ) ներկայացնում է Վեհափառի գործունեության առանցքային ոլորտները։

Հատորում տեղ են գտել՝

• ընտրված պատկերներ՝ ուղեկցված հակիրճ տեղեկություններով,

• կարևոր նախաձեռնությունների ու իրադարձությունների հիշատակումներ,

• Վեհափառ Հայրապետի պատգամներից մեջբերումներ։

Պատկերագիրքն ընդգծում է Արամ Ա Կաթողիկոսի առաջնորդության առանձնահատկությունները՝ ներկայացնելով ինչպես նրա անձնուրաց ծառայությունը, այնպես էլ Մեծի Տանն Կիլիկիո Կաթողիկոսության համազգային առաքելության հիմնարար ուղղությունները։ Հրատարակությունները շուտով հասանելի կլինեն ՀԱԳ ընթերցողներին։