«Արևմուտքում հայ մշակույթի համաշխարհային ճանաչում ունեցող դեմքերի մեջ, ինչպիսիք են Արամ Խաչատրյանը, Շառլ Ազնավուրը, Ատոմ Էգոյանը, ամերիկահայ նկարիչ Արշիլ Գորկին ամենից ճանաչված և ընդունված արվեստագետն է»: Մայիսի 2-ին Հայաստանի ազգային գրադարանի թամանյանական մեծ դահլիճում այս խոսքերով սկսեց Արշիլ Գորկուն նվիրված իր հանրային դասախոսությունը լիբանանահայ ճանաչված մտավորական, արվեստագիտության թեկնածու Մովսես Հերկելյանը:

Ներկայացնելով Ազգային գրադարանի հյուրին՝ գրադարանի հանրային կապերի բաժնի վարիչ Ներսես Հայրապետյանը նշեց, որ Ազգային գրադարանն արդեն երկրորդ անգամ է հյուրընկալում պարոն Հերկելյանին. նախորդ տարի նա գրադարանում հանդես եկավ «Այվազովսկին և թուրքերը» հետաքրքիր բանախոսությամբ: Հերկելյանը գրադարանին արժեքավոր արվեստագիտական գրականություն է նվիրել, նա գրադարանին կփոխանցի նաև իր հրատարակած գրքերի թվայնացման և հայ գրքի շտեմարաններում ազատ գործածության իրավունքը:

Մովսես Հերկելյանը ներկայացրեց Արշիլ Գորկու ընտանիքի պատմությունը, Արևմտյան Հայաստանից Արևելյան Հայաստան գաղթի ճանապարհը, ապա նաև՝ Միացյալ Նահանգներում նրանց հաստատվելը: Ծանր է եղել նկարչի ամբողջ կյանքը՝ մինչև ողբերգական վախճանը: Բանախոսը նշեց, որ Արշիլ Գորկու կտավները 1980-ական թվականներից միջազգային աճուրդներում թանգարանների և անհատ հավաքորդների համար տարեցտարի ավելի մրցակցային են դարձել: Ոչ մի ուրիշ հայ նկարչի գործեր երբևէ նման բարձր գնով չեն վաճառվել, որքան Արշիլ Գորկու կտավները: Սակայն ցավոք նրա ստեղծագործությունը տակավին անծանոթ է հայ հասարակությանը: Մովսես Հերկելյանը խոսեց նաև նկարչի առանձին գործերի և նկարչական շարքերի մասին։ Այնուհետև զրույցը շարունակվեց հարցուպատասխանի ձևաչափով։