Գրական ցերեկույթ | Էդվարդ Ջրբաշյան

նմբ 20, 2023 Միջոցառումներ Ցուցահանդեսներ

001

Նոյեմբերի 23-ին թամանյանական մասնաշենքի փոքր դահլիճում ազատ աթոռներ չկային։ Լեփ-լեցուն դահլիճում տեղի ունեցավ գրական ցերեկույթ նվիրված ականավոր գրականագետ, բանասիրական գիտությունների դոկտոր, պրոֆեսոր, ակադեմիկոս Էդվարդ Ջրբաշյանի 100-ամյակին։

002

Գրականագետ, բանասիրական գիտությունների դոկտոր, պրոֆեսոր Սամվել Մուրադյանը, անդրադառնալով ակադեմիկոս Էդվարդ Ջրբաշյանի կյանքին և գործունեությանը, մտերմիկ հուշեր պատմեց համատեղ աշխատանքից՝ ԵՊՀ հայագիտության կենտրոնում, «Բանբեր Երևանի համալսարանի» հանդեսում, այնուհետև՝ դասախոսական գործունեության տարիներին։ Սամվել Մուրադյանը ներկայացրեց հանդեսի խմբագրի աշխատանքը խորհրդային գրաքննության պայմաններում, Թումանյանի, Չարենցի, Իսահակյանի և այլ գրողների ստեղծագործությունների տպագրության հետ կապված երբեմն անլուծելի վիճակները և դժվարությունները։

003

Գրականագետ, համահայկական գրողների միության նախագահ Աբգար Ափինյանը ներկայացրեց ծագումով վանեցի Ջրբաշյանների գերդաստանի ընտանեկան ալբոմը, բնութագրեց Ջրբաշյանների գիտական ներդրումը Հայաստանի ժողովրդական տնտեսության բազմաթիվ ասպարեզներում։ Գրականագետի իր խոսքը նա մատուցեց Ջրբաշյանների տարբեր սերունդի ներկայացուցիչների լուսանկարների ուղեկցությամբ։

004

Գրական ցերեկույթի ավարտին ելույթ ունեցավ անվանի գրականագետի դուստրը՝ Աշխեն Ջրբաշյանը։ Նա շնորհակալական խոսք ասաց Հայաստանի ազգային գրադարանի աշխատակիցներին, ընդգծելով, որ շատ բաներ բացահայտեց Էդվարդ Ջրբաշյանին նվիրված գրականության ցուցադրությունը դիտելով։