Նոյեմբեր 23-ին, թամանեանական մասնաշէնքի փոքր դահլիճէն ներս ազատ աթոռներ չկային։ Լեփ-լեցուն դահլիճին մէջ տեղի ունեցաւ գրական ցերեկոյթ մը՝ նուիրուած ականաւոր գրականագէտ, բանասիրական գիտութեանց դոկտոր, փրոֆեսոր, ակադեմիկոս Էտուարտ Ջրպաշեանի 100-ամեակին։  

 

Գրականագէտ, բանասիրական գիտութեանց դոկտոր, փրոֆեսոր Սամուէլ Մուրատեանը, անդրադառնալով ակադեմիկոս Էտուարտ Ջրպաշեանի կեանքին եւ գործունէութեան, մտերմիկ յուշեր պատմեց համատեղ աշխատանքէն՝ ԵՊՀ Հայագիտութեան կեդրոնէն ներս, «Բանբեր Երեւանի համալսարանի» հանդէսին մէջ, այնուհետեւ՝ դասախօսական գործունէութեան տարիներուն։ Սամուէլ Մուրատեանը ներկայացուց հանդէսի խմբագրին աշխատանքը խորհրդային գրաքննութեան պայմաններուն ներքոյ, Թումանեանի, Չարենցի, Իսահակեանի եւ այլ գրողներու ստեղծագործութիւններու տպագրութեան առնչեալ երբեմն անլուծելի վիճակներն ու դժուարութիւնները:  

 

Գրականագէտ, համահայկական գրողներու միութեան նախագահ Աբգար Ափինեանը ներկայացուց ծագումով վանեցի Ջրպաշեաններու գերդաստանի ընտանեկան նկարատետրը, բնութագրեց Ջրպաշեաններու գիտական ներդրումը Հայաստանի ժողովրդական տնտեսութեան բազմաթիւ ասպարէզներէն ներս։ Անգրականագիտական իր խօսքը մատուցեց Ջրպաշեաններու տարբեր սերունդի ներկայացուցիչներու լուսանկարներու ուղեկցութեամբ։ 

 

Գրական ցերեկոյթին աւարտին ելոյթ ունեցաւ անուանի գրականագէտին դուստրը՝ Աշխէն Ջրպաշեանը։ Վերջինս շնորհակալական խօսք ըսաւ Հայաստանի ազգային գրադարանի աշխատակիցներուն՝ ընդգծելով, որ շատ բաներ բացայայտեց Էտուարտ Ջրպաշեանին նուիրուած գրականութեան ցուցադրութիւնը դիտելով։