Հունվարի 20-ին Հայաստանի ազգային գրադարանի արվեստի սրահում սփյուռքահայ անվանի գրականագետ, գրող Գրիգոր Պլտյանի 80-ամյակին նվիրված հանրային միջոցառում էր կազմակերպված։

Միջոցառման բանախոսն էր բանասիրական գիտությունների թեկնածու, ՀՀ ԿԳՄՍՆ լեզվի կոմիտեի նախագահ Սիրանուշ Դվոյանը: Նա անդրադարձավ Պլտյանի գրական ժառանգությանը և ստեղծագործական ճանապարհին, հայ ժամանակակից գրականագիտության զարգացման գործում նրա ունեցած դերին։ Հայտնի է, որ մասնակից լինելով և գործելով եվրոպական գրական և գրականագիտական գործընթացներում, Գրիգոր Պլտյանը մշտապես կենդանի է պահել հայրենի գրականագետների հետ իր կապերը: Պլտյանը վերջին երկու տասնակյակներում իր գրքերը հիմնականում Երևանում է հրապարակում:

Միջոցառումն ընդգծեց Պլտյանի նշանակալի գրական վաստակը, որը տարիներ շարունակ երիտասարդ սերնդի հետազոտողներին է փոխանցում գրականության հանդեպ իր անսպառ սերն ու գիտելիքը։ Հոբելյանի առթիվ հանրային կապերի բաժինը գրականագետի գրքերի հարուստ ցուցադրություն էր պատրաստել:

Հանդիպումն անցավ ջերմ ու մտերմիկ մթնոլորտում՝ գրականության և պատմության սիրահարների մասնակցությամբ։