Պարբերական մամուլը աշխարհասփյուռ հայության կյանքի, հայ ստեղծարար մարդու մասին պատմող առաջնային աղբյուր է։ Աշխարհում մինչև օրս ավելի քան 6000 անուն պարբերական հրատարակություն է լույս տեսել, որոնց կեսը՝ աշխարհի տարբեր երկրներում։ Թվային դարաշրջանում նույնպես ոչ միշտ հայերեն, սակայն բովանդակությամբ հայկական պարբերականներ են ի հայտ գալիս։

Այդպիսի մի պարբերական է Հոլանդիայի Ուտրեխտ քաղաքի «Գլաձոր» հայ ուսանողական միության կողմից թողարկվող «Արաքս» էլեկտրոնային պարբերականը, որի 2017-2024 թվականների համարներն արդեն հասանելի են «Հայ մամուլ» շտեմարանից։ «Արաքս» պատկերազարդ էլեկտրոնային պարբերականը հրապարակվում է հոլանդերեն ուսանողների ուժերով։ Երբեմն տեղ են գտնում նաև հայերեն ճանաչողական բնույթի նյութեր։

2017 թ. նոյեմբերյան համարում փոքրիկ տեղեկություն կա Մատթեոս Ծարեցու մասին, որը 1661 թ. հունվարի 3-ին Ամստերդամում տպագրեց առաջին հայերեն գրքույկը՝ «Հիսուս որդի» վերնագրով։ «Գլաձոր» հայ ուսանողական միության գործունեության մասին կարելի է տեղեկանալ նրանց անգլերեն և հոլանդերեն կայքից՝ https://gladzor.nl/: