Հայաստանի ազգային գրադարանի թամանյանական մեծ դահլիճը մարտի 21-ին լեցուն էր պոեզիայով։ Գրադարանը հյուրընկալել էր հայ ժամանակակից հեղինակներ Արփի Ոսկանյանին, Ռուզան Ազիզյանին, Նշան Աբասյանին, Դավիթ Սամվելյանին, Եր Կարին (Երեմ Կարապետյան), Արամ Ավետիսին։

Իրար հաջորդելով նրանք ընթերցեցին իրենց ինքնօրինակ ստեղծագործություններից և պատասխանեցին ներկաների հարցերին։ Բուռն քննարկում ծավալվեց ժամանակակից բանաստեղծության շուրջ։ Ի՞նչի մասին է գրում ժամանակակից բանաստեղծը, ո՞վ է նա։ Կարևո՞ր է արդյոք գրողի ինքնատիպ լինելը:

Ինչպես որ մեր ժամանակն է բազմադեմ, այնպես էլ՝ բանաստեղծական ժանրերը։ Երբեմն դժվար է տարանջատել ժամանակակից պոետների և արձակագիրների տեքստերի սահմանները։ Վերջին տարիների անցքերը իրենց հետքն են թողել նաև ստեղծագործողների վրա։ Հաճախ նրանք խոսքը մատուցում են լրագրողական նշումների, այլասացության, եզովպոսյան լեզվով։

Ազգային գրադարանի միջազգային այցելու փորձնակ, ազգությամբ ֆրանսիացի Վադիմ Բեմը ֆրանսերեն կարդաց 18-րդ դարի ֆրանսիացի բանաստեղծ Անդրե Շենիեի մի բանաստեղծություն։ Դահլիճի մի անկյունում ցուցադրված էին նաև բանաստեղծների գրքերը։ Գրողներն իրենց ընծայագրերով գրքեր նվիրեցին Ազգային գրադարանին։