Այսօր Պարույր Սևակի ծննդյան օրն է։ 2024 թ. անցավ Սևակի 100-ամյակը նշանավորող մեծ ու փոքր բազմաթիվ իրադարձություններով։ Սևակի գրական ժառանգությունը, նրա գրքերը, թարգմանությունները, հոդվածները, նրա մասին տարբեր լեզուներով հրատարակությունները մեկ ցուցադրությամբ որևէ գրադարանում հնարավոր չէ ներկայացնել։

Բանաստեղծի տպագիր ժառանգությունն ի մի բերելու համար Հայաստանի ազգային գրադարանը մատենագետների խումբ է առանձնացրել, որոնք բանաստեղծի ծննդյան հարյուրամյակի առթիվ պատրաստում են կազմել ու հանրահռչակել նրա ամբողջական գրական ժառանգությունը։ Մատենագիտությունը լրացնելու է 1968 թ. և 1983 թ. կազմված ցանկերից դուրս մնացած, ինչպես նաև դրանց տպագրությունից հետո լույս տեսած հրատարակությունները։

Նյութերի ժամանակագրական ընդգրկումն է 1941-2024 թթ.։ Այն ներկայացնելու է Պարույր Սևակի գրքերի, մամուլի հոդվածների, Սևակի մասին գրքերի և հոդվածների, նրա նամակների մատենագիտությունը։ Գրքի կարևոր բաժիններից են լինելու «Պարույր Սևակը արվեստում» և «Պարույր Սևակը գեղարվեստական գրականության մեջ» գլուխները։ Սևակի լիակատար մատենագիտությունը պատրաստ կլինի տպագրության 2025թ. ավարտին։