Հայաստանի ազգային գրադարանի թամանեանական մեծ դահլիճը մարտ 21-ին լեցուն էր բանաստեղծութեամբ։ Գրադարանը հիւրընկալած էր հայ ժամանակակից հեղինակներ Արփի Ոսկանեանը, Ռուզան Ազիզեանը, Նշան Ապասեանը, Դաւիթ Սամուէլեանը, Եր Կարը (Երեմ Կարապետեան), Արամ Աւետիսը։

Իրար յաջորդելով անոնք ընթերցեցան իրենց ինքնօրինակ ստեղծագործութիւններէն եւ պատասխանեցին ներկաներուն հարցումներուն։ Բուռն քննարկում ծաւալուեցաւ ժամանակակից բանաստեղծութեան շուրջ։ Ինչի՞ մասին կը գրէ ժամանակակից բանաստեղծը, ո՞վ է ան։ Կարեւո՞ր է արդեօք գրողին ինքնատիպ ըլլալը։

Ինչպէս որ մեր ժամանակն է բազմադէմ, այնպէս ալ՝ բանաստեղծական ժանրերը։ Երբեմն դժուար է տարանջատել ժամանակակից բանաստեղծներու եւ արձակագիրներու գրութեանց սահմանները։ Վերջին տարիներուն անցքերը իրենց հետքը թողած են նաեւ ստեղծագործողներուն վրայ։ Յաճախ անոնք խօսքը կը մատուցեն լրագրողական նշումներու, այլասացութեան, եզովպոսեան լեզուով։ 

Ազգային գրադարանի միջազգային այցելու փորձնակ, ազգութեամբ ֆրանսացի Վատիմ Պեմը ֆրանսերէն կարդաց 18-րդ դարու ֆրանսացի բանաստեղծ Անտրէ Շենիէի բանաստեղծութիւններէն մին։ Դահլիճին մէկ անկիւնը ցուցադրուած էին նաեւ բանաստեղծներուն գիրքերը։ Գրողները իրենց ընծայագիրներով գիրքեր նուիրեցին Ազգային գրադարանին։