Յուլիս 18-ին աշխատանքային-ճանաչողական այցելութեամբ Հայաստանի ազգային գրադարան հիւրընկալուած էին «Վետի համայնքի գրադարան» ՀՈԱԿ-ի գրադարանավարները։ Մեր հիւրերը նախ այցելեցին Գրատպութեան թանգարան, ուր մեծ հետաքրքրութեամբ ծանօթացան հայ գրատպութեան աւելի քան 510-ամեայ պատմութեան:

Ազգային գրադարանի թամանեանական շէնքէն ներս գրադարանավարներուն շրջայցը վարեց ՀԱԳ Գիտական աշխատանքներու գծով փոխտնօրէն Հայկանոյշ Ղազարեանը։ Ան ներկայացուց գրադարանի հիմնադրման եւ հաւաքածոներու ձեւաւորման պատմութիւնը, գրադարանին անցած ճանապարհը։ Գրադարանավարներուն հետ աշխոյժ քննարկում տեղի ունեցաւ՝ նուիրուած գրադարաններուն եւ, մասնաւորապէս, համայնքային գրադարաններուն խնդիրներուն։  

Այնուհետեւ գրադարանավարներու խումբին հետ հանդիպեցան Հանրային կապերու եւ թուայնացման ու Հրատարակման բաժիններու վարիչները, որոնք ներկայացուցին իրենց կատարած աշխատանքը։ Համագործակցութեան եւ գրքափոխանակութեան բաժնի աշխատակից Անիցա Կենճեանը համայնքային գրադարանավարներուն համար գործնական զրոյց ունեցաւ «Microsoft Excel» ծրագրի միջոցաւ փոքր գրադարանային հաւաքածոներու պարզ շտեմարան ստեղծելու հարցով։ Հաճելի է նշել, որ վերջին շրջանին աշխուժացած են Ազգային գրադարանի կապերը տարբեր մարզերու համայնքային գրադարաններուն հետ։ Հայաստանի ազգային գրադարանը կը կարեւորէ նման գործընկերային այցելութիւնները, գրադարանավարներուն շփումները եւ համագործակցութիւնը։