Հայաստանի ազգային գրադարանի թամանեանական մեծ դահլիճէն ներս ցուցադրուեցաւ Սինէ-ակումբի հերթական ֆիլմը՝ ֆրանսացի հռչակաւոր ֆիլմի բեմադրիչ Ֆրանսուա Թրիւֆոյի «400 հարուած»-ը։ Ֆիլմագէտ, «Ֆիլմադարան» հասարակական կազմակերպութեան նախագահ Գարեգին Զաքոյեանը նախքան ֆիլմի ցուցադրութիւնը հանդիսատեսին ներկայացուց ֆրանսացի հանճարեղ բեմադրիչը, խօսեցաւ անոր փառք ու յաջողութիւն բերած ֆիլմերուն մասին։ Ան ընդգծեց, որ ֆրանսական «Նոր ալիքի» դասական նմուշ «400 հարուած» ֆիլմը Թրիւֆոյի առաջին մեծ յաջողութիւնն էր։

Ֆրանսուա Թրիւֆոն ֆիլմային մեծ ժառանգութիւն մը թողած է, որուն արդիականութիւնը պիտի խոստովանին նաեւ ապագայ սերունդները։ Զաքոյեանը նշեց, որ Թրիւֆոն ֆրանսական ֆիլմարուեստի դասականներէն է, «որուն մտածողութիւնն ու հայեացքը ձգուած են դէպի մեր հազարամեակ»։

«Դժուար դեռահաս» տասներկամեայ Անթուան Տուանէլի մասին «400 հարուած»-ը ֆրանսական «նոր ալիքի» առաջին եւ ամէնէն յայտնի ֆիլմերէն մէկն է։ Թրիւֆոյի մայրը այդպէս ալ չէ ներած որդին՝ մասամբ ինքնակենսագրական այս ֆիլմին մէջ անոր ինքնախոստովանութեան համար։ Սինէ-ակումբը Հայաստանի ազգային գրադարանէն ներս կը գործէ արդէն երրորդ տարին ըլլալով՝ «Ֆիլմադարան» ֆիլմային մշակոյթի զարգացման հասարակական կազմակերպութեան, Ազգային գրադարանի, Հայաստանի մէջ Ֆրանսայի դեսպանութեան, Ֆրանսական հիմնարկի համագործակցութեամբ։ Սինէ-ակումբի յաջորդ ցուցադրութիւնը՝ ապրիլ 2-ին, ժամը՝ 18։30-ին է։ Մանրամասնութիւնները՝ ➡ https://nla.am/blog/kinvoakvoumb։