Յունիս 27-ին կը լրանայ Հայաստանի ազգային գրադարանի երկրորդ տնօրէն Երուանդ Թաղիանոսեանի 160-ամեակը։ Թաղիանոսեանը ծնած է Երեւան՝ 1864 թուին: Ուսանած է Էջմիածնի Գէորգեան ճեմարանը, ապա Մոսկուայի համալսարանը: 1895-1899 թուականներուն եղած է մատենադարանապետ եւ դաստիարակ Լազարեան ճեմարանէն ներս: 1899-էն աշխատած է Պաքուի զանազան հաստատութիւններու մէջ (Հայոց մարդասիրական, Հայոց հրատարակչական ընկերութիւններ եւ այլն):

1922-1928 թուականներուն ան եղած է պետական հանրային գրադարանի տնօրէնը: Անոր ղեկավարութեան տարիներուն գրադարանէն ներս հիմք դրուած է այբբենական եւ կարգային քարտարաններու կազմումին եւ գրադարանի հաւաքածոներու գիտական մշակումին եւ դասակարգումին։ Երուանդ Թաղիանոսեանը եղած է ժամանակի ճանաչուած մտաւորականներէն մէկը։ Ան բնագիրներէն հայերէն թարգմանած է Ֆ. Ռապլէի, Ժ. Վեռնի, Մ. Կորքիի եւ այլ գրողներու գործեր: