Հերթական երեքշաբթի ֆիլմասէրները հաւաքուած էին մեր թամանեանական մեծ դահլիճին մէջ՝ Սինէ-ակումբին մէջ դիտելու ֆրանսական ֆիլմերու ընտրանին. ֆիլմեր, որոնք նաեւ համաշխարհային ֆիլմարուեստի գլուխգործոցներ են։ Դեկտեմբեր 3-ին՝ Ժան Լիւք Կոտարի ծննդեան օրը, ցուցադրուեցաւ անոր ամէնէն արտասովոր ֆիլմը՝ «Պատկերագիրքը», որ Քանի 71-րդ ֆիլմի փառատօնին արժանացած է մրցատեանի յատուկ մրցանակին։

Համաշխարհային ֆիլմի մեծութիւն Ժան Լիւք Կոտարը ֆրանսական նոր ալիքի առանցքային դէմքերէն է: Անոր ֆիլմերը, 1960-ականներէն սկսեալ, ընդմիշտ փոխեցին ֆիլմի նկատմամբ մօտեցումը՝ որպէս արուեստի ձեւ։

«Պատկերագիրքը» արտառոց ֆիլմ մըն է նոյնիսկ պատրաստուած հանդիսատեսին համար: Ֆիլմը գրեթէ բնաբան չունի, բայց յագեցած է ֆիլմէ եւ կերպարուեստէ տեսողական մէջբերումներով ու յղումներով։

Այս մոնթաժային ֆիլմը՝ առանց դերասաններու եւ նուազագոյն բնաբանի, լի է երեւակայական պատկերներով։ Անիկա չի յոգնեցներ, իսկ Կոտարը կը պահպանէ իր կատաղի ու խելագար ուժը՝ ներքին համակարգով մը, որ քիչերուն հասանելի է։ Հաւանաբար, ֆիլմը հասկնալու բանալին նոյնինքն անուան մէջ է: «Le livre d'image»-ը կարելի է թարգմանել «պատկերագիրք» կամ, այլ տարբերակով՝ «նկարազարդ ուսումնական ձեռնարկ»։ Արուեստէ եւ ֆիլմէ տեսողական մէջբերումները համոզիչ են... Բնագիրը կը դառնայ անհասանելի խառնաշփոթ մը, մինչ պատկերները աւելի ու աւելի ուժգին ու մռայլ կը դառնան:

«Պատկերագիրքը» դիտելը բաւական դժուար է. ֆիլմը հանելուկներ կ՚առաջադրէ հանդիսատեսին, որոնց կը ցանկաս վերադառնալ՝ փորձելով գուշակել առաջարկուող պատկերներուն թաքնուած իմաստը։ Ահա այս բոլորին ականատես եղանք դեկտեմբեր 3-ին Ազգային գրադարանի Սինէ-ակումբին մէջ: Սինէ-ակումբը Հայաստանի ազգային գրադարանին մէջ կը գործէ արդէն երրորդ տարին ըլլալով՝ «Ֆիլմադարան» ֆիլմի մշակոյթի զարգացման հասարակական կազմակերպութեան, Ազգային գրադարանի, Հայաստանի մէջ Ֆրանսայի դեսպանութեան Ֆրանսական հիմնարկի համագործակցութեամբ՝ ֆիլմասէրներուն ներկայացնելով ֆրանսական ֆիլմերու ընտրանի մը։ Ֆիլմերը կը ցուցադրուին ֆրանսերէնով՝ հայերէն եւ անգլերէն ենթագիրներով։