Այս տարի կը նշուի Ակսէլ Բակունցի ծննդեան 125-ամեակը։ Ազգային գրադարանը հայ անզուգական արձակագրին ժառանգութեան հանրահռչակման նպատակաւ ապրիլին ընթերցանութեան մարաթոն մը կազմակերպած էր, որուն տասնեակ գրադարաններ եւ հարիւրաւոր ընթերցողներ արձագանգեցին։ Նոյեմբեր 28-ին Հայաստանի ազգային գրադարանին մէջ Ակսէլ Բակունցին նուիրուած հանրային դասախօսութիւն մը ներկայացուց բանասիրական գիտութիւններու թեկնածու, դոցենտ, ՀՀ ԳԱԱ Մ․ Աբեղեանի անուան գրականութեան հիմնարկի յառաջատար գիտաշխատող Սաթենիկ Աւետիսեանը։ Անոր զեկուցման նիւթը՝ «Ոգիի նախատիպի բազմակերպութիւնը Ակսէլ Բակունցի արձակին մէջ», շատերու հետաքրքրութիւնը գրաւած էր։

Դասախօսը Ակսէլ Բակունցի ստեղծագործութեան վերլուծումը կատարեց ըստ զուիցերացի հոգեբոյժ, խորքային հոգեբանութեան ուղղութիւններէն մէկուն՝ վերլուծական հոգեբանութեան հիմնադիր Քարլ Կուսթաւ Եունկի նախատիպերու տեսութեան։ Եունկը, իբրեւ համամարդկային երեւոյթ, վերլուծելով առասպելներու բնաբանները, որոնց մէջ կը կրկնուին նոյն դրուագները, պատումներն ու կերպարները՝ նախատիպ կոչուած են։ Սաթենիկ Աւետիսեանը զուգահեռներ տարաւ Յովհաննէս Թումանեանի «Անխելք մարդը» եւ 14-ամեայ Ակսէլ Բակունցի գրած «Յիմար մարդը» հեքիաթներուն միջեւ։ Ան հետաքրքրական վերլուծումներով անդրադարձաւ Բակունցի երեք անաւարտ վիպական գործերուն՝ «Մթնաձոր», «Միրհաւ», «Ալպիական մանուշակ» եւ այլ պատմուածքներու։

Դասախօսութեան ներկայ էին Սաթենիկ Աւետիսեանի ներկայ եւ նախկին աշակերտները, գրադարանի պաշտօնեաներ եւ ընթերցողներ։