Լոյս տեսած է Հայաստանի ազգային գրադարանի «Յիշարժան տարեթիւեր 2025» օրացոյցը։ Տեղեկատուական այս ցանկի ելեկտրոնային տարբերակը եւս շուտով կը տեղադրուի գրադարանի ելեկտրոնային շտեմարանին մէջ։

«Յիշարժան տարեթիւեր»-ը Ազգային գրադարանի պարբերական հրատարակութիւններէն ամէնէն երկարամեան է, լոյս կը տեսնէ 1947 թուականէն ի վեր։

Սկզբնական շրջանին օրացոյցը հրատարակուած է ցուցանակի ձեւով։ 1957 թուականէն լոյս տեսած է եռամսեակը անգամ մը՝ «Նշանաւոր եւ յիշարժան տարեթիւեր» խորագրով: 1995-1998 թուականներուն «Յիշարժան տարեթիւեր» օրացոյցը չէ հրատարակուած։

Վերջին տարիներուն օրացոյցը կը կազմեն Ազգային գրադարանի մատենագիտութեան եւ գրադարանագիտութեան բաժնի աշխատակիցները։ Կը հրատարակուի տարեկան մէկ անգամ։ Գիրքը կազմելու ատեն մեր աշխատակիցները կ'օգտուին հանրագիտարաններէն, կենսագրական բառարաններէն, Հայաստանի ստեղծագործական միութիւններու տեղեկատուներէն, առցանց աղբիւրներէն եւ այլն։

Հրատարակութիւնը գրադարաններուն, զանգուածային լրատուամիջոցներուն, տեղեկատուական հաստատութիւններուն եւ կազմակերպութիւններուն կ'օգնէ տարուան յոբելենական տարելիցներուն անդրադառնալու։