Լույս է տեսել Հայաստանի ազգային գրադարանի «ՀԻՇԱՐԺԱՆ ՏԱՐԵԹՎԵՐ 2025» օրացույցը։ Տեղեկատվական այս ցանկի էլեկտրոնային տարբերակը ևս շուտով կտեղադրվի գրադարանի էլեկտրոնային շտեմարանում։ «ՀԻՇԱՐԺԱՆ ՏԱՐԵԹՎԵՐ»-ն Ազգային գրադարանի պարբերական հրատարակություններից ամենաերկարամյան է, լույս է տեսնում 1947 թվականից։

Սկզբնական շրջանում օրացույցը հրատարակվել է պլակատի ձևով։ 1957 թվականից լույս է տեսել եռամսյակը մեկ՝ «Նշանավոր և հիշարժան տարեթվեր» խորագրով: 1995-1998թթ. «Հիշարժան տարեթվեր» օրացույցը չի հրատարակվել։ Վերջին տարիներին օրացույցը կազմում են Ազգային գրադարանի մատենագիտության և գրադարանագիտության բաժնի աշխատակիցները։ Հրատարակվում է տարեկան մեկ անգամ։ Գիրքը կազմելիս մեր աշխատակիցներն օգտվում են հանրագիտարաններից, կենսագրական բառարաններից, ՀՀ ստեղծագործական միությունների տեղեկատուներից, առցանց ռեսուրսներից և այլն։

Հրատարակությունը գրադարաններին, զանգվածային լրատվամիջոցներին, տեղեկատվական հաստատություններին և կազմակերպություններին օգնում է տարվա հոբելյանական տարելիցներին անդրադառնալու հարցում։