«Սարոյեանական օրեր» ծրագրի շրջանակներէն ներս, Հայաստանի ազգային գրադարանէն ներս բացուեցաւ «Սարոյեանի մշակութային ազդեցութիւնը եւ հայերէն հրատարակութիւնները» խորագրով «Ուիլիամ Սարոյեանը՝ Ազգային գրադարանէն ներս» գրականութեան ցուցահանդէսը։ Ցուցահանդէսին ներկայացուած էին Սարոյեանի գործերուն բացառապէս հայերէն թարգմանութիւնները։ Միջոցառման պատուաւոր հիւրն էր «Ուիլիամ Սարոյեան» հիմնադրամի նախագահ Սքոթ Սեդրաքեանը։ Ան գրադարանին նուիրեց Սարոյեանի բնօրինակ անտիպ նկարչական աշխատանքներէն մէկը, որ իր պատուաւոր տեղը պիտի գտնէ Ազգային գրադարանէն ներս։ Սքոթ Սեդրաքեան, խօսելով Սարոյեանի գրական ժառանգութեան կարեւորութեան մասին, յոյս յայտնեց, որ օր մը Ազգային գրադարանէն ներս Սարոյեանական անկիւն մը պիտի գործէ։

Հայաստանի ազգային գրադարանի տնօրէնուհի Աննա Չուլեանը ներկայացուց նաեւ Հայաստանի գրադարաններու համահաւաք գրացուցակին մէջ ստեղծուած «Ուիլիամ Սարոյեան» թուային հաւաքածոն https://is.gd/Mc3mhY, որ շարունակաբար պիտի համալրուի նոր նիւթերով՝ դառնալով Սարոյեանի գրական ժառանգութեան ամբողջական շտեմարանը։Սարոյեանի հրատարակութիւններու նոր թարգմանութիւններուն, անոնց կարեւորութեան եւ անհրաժեշտութեան մասին խօսեցաւ Սարոյեանի գործերու թարգմանիչ Զաւէն Պոյաճեանը։ Անոր համոզմամբ՝ այսօր առաւել քան երբեւէ անհրաժեշտ է նոր թարգմանութիւններով վերադառնալ Սարոյեանի գործերուն․ «Շատեր կը կարծեն, թէ Սարոյեանի գործերը կը սպառին արդէն հրատարակուած ժողովածոներով, բայց կը հաւատացնեմ՝ բնաւ այդպէս չէ։ Սարոյեանի բազմաթիւ գործեր առանձնակի կարեւոր են մեզի՝ հայերուս համար, եւ անոնք անպայման պէտք է թարգմանուին»։

Իսկ «ARLOOPA» յաւելուածին միջոցաւ հիւրերը հնարաւորութիւն ունեցան տեսնելու Սարոյեանը Ազգային գրադարանէն ներս եւ լսելու անոր ձայնը։ https://is.gd/SWper5 Սարոյեանը կրկին կը վերադառնայ Ազգային գրադարան՝ իր ստեղծագործութիւններով ու անմահ ներկայութեամբ։