Հայաստանի ազգային գրադարանէն ներս տեղի ունեցաւ «Հայ տպագրութեան տարեգիրք» տեղեկատու մատենագիտական հրատարակութեան 100-ամեակին նուիրուած հանդիպում մը։

🔹 Մատենագիտութեան եւ գրադարանագիտութեան բաժնի Հայ գիրքի եւ մամուլի ենթաբաժնի վարիչ Աստղիկ Ներսէսեանը հանդէս եկաւ համապարփակ զեկոյցով՝ անդրադառնալով տարեգիրքի կազմուելու երկարամեայ ու պատասխանատու աշխատանքին, անոր պատմական զարգացման ու կարեւոր առաքելութեան։

🔹 «Հայ տպագրութեան տարեգիրք»-ը առաջին անգամ լոյս տեսած է 1925 թուականին Պետական գրապալատէն ներս։ Անցնելով երկար ճանապարհ եւ ըլլալով շարունակական հրատարակութիւն, անիկա 2017 թուականէն շարունակած է հրատարակուիլ արդէն Հայաստանի ազգային գրադարանէն ներս։

🔹 «Հայ տպագրութեան տարեգիրք»-ը իր 100-ամեայ պատմութեամբ ունի իր անչափ կարեւոր առաքելութիւնը հայ մատենագիտութեան եւ գրադարանագիտութեան ոլորտէն ներս, որուն կազմուելու աշխատանքները կ’իրականացուին Հայաստանի ազգային գրադարանի Մատենագիտութեան եւ գրադարանագիտութեան բաժնի նուիրեալ եւ հմուտ մատենագէտներու կողմէ։

🔹 «Հայ տպագրութեան տարեգիրք» ամէնամսեայ մատենագիտական ցանկին վրայ կ’արտացոլուին Հայաստանի Հանրապետութեան եւ սփիւռքի մէջ լոյս տեսնող գիրքերու, թերթերուն, ամսագիրներու, պարբերական եւ շարունակուող հրատարակութիւններու մէջ հրապարակուած յօդուածներու, գրախօսութիւններու, ատենախօսութիւններու սեղմագիրներու, մատենագիտական նկարագրութիւնները։ Ազգային մատենագիտութեան «Հայ տպագրութեան տարեգիրք»-ի ամբողջականութիւնը կախուած է Հայաստանի ազգային գրադարանի՝ հանրապետութեան մէջ եւ Սփիւռքին մէջ լոյս տեսած մամուլի գրականութեան ժամանակին ու ամբողջական ստացումէն։

🔹 Միջոցառման շրջանակէն ներս անգամ մը եւս ընդգծուեցաւ տարեգիրքին դերը ազգային գրաւոր ժառանգութեան պահպանման ու համակարգման գործին մէջ։

🔹 «Հայ տպագրութեան տարեգիրք» մատենագիտութեան բոլոր համարները ներկայացուած են www.nla.am կայքին վրայ.

1925–1993 թթ.՝ https://is.gd/eqvT2n 1994–2025 թթ.՝ https://is.gd/E64dkh «Հայ տպագրութեան տարեգիրք»-ի պատասխանատու՝ Ն. Դանիէլեան, խմբագիր՝ Ա. Ներսէսեան, կազմողներ՝ Ն. Դանիէլեան, Ժ. Մանուկեան, Ա. Ներսէսեան, Մ. Յակոբճանեան, Ա. Մինասեան, Լ. Պետրոսեան, Լ. Ղուկասեան, Է. Յակոբեան։ Էջադրող, համակարգչային ձեւաւորող՝ Շ. Աղաբէկեան։