Չեքիոյ Հանրապետութեան արտակարգ եւ լիազօր դեսպան Ն. Գ. Փեթր Փիրունչիքի գլխաւորած պատուիրակութիւնը այսօր աշխատանքային այցելութեամբ Հայաստանի ազգային գրադարանը կը գտնուէր։ Պատուիրակութեան կազմին մէջ էին նաեւ փոխդեսպան Եաքուպ Լեւանտովսքին, դեսպանի օգնական Սիրանոյշ Յակոբեանը եւ Չեքիոյ Հանրապետութեան Արտաքին գործոց նախարարութեան Հանրային դիւանագիտութեան եւ արտադրութեան վարչութեան պետ Էլիշքա Չեշլարովան։ Հայաստանի ազգային գրադարանի տնօրէնուհի Աննա Չուլեանի ուղեկցութեամբ պատուիրակութիւնը շրջեցաւ գրադարանի թամանեանական մասնաշէնքին մէջ, ծանօթացաւ գրադարանին բազմակողմանի գործունէութեան։

Հանդիպման ընթացքին քննարկուեցան հայ-չեքական համագործակցութեան, մշակութային եւ գիտական կապերու ամրապնդման հեռանկարային շարք մը ծրագիրներ։ Քննարկումներուն առանցքը եղաւ նաեւ մշակութային ժառանգութեան հանրահռչակումը։ Առանձնայատուկ ուշադրութիւն դարձուեցաւ մասնագիտական համագործակցութեան զարգացման եւ համատեղ թարգմանական գրականութեան հրատարակման հնարաւորութիւններուն։

Արժեւորելով երկու երկրներու ազգային գրադարաններուն միջեւ արդիւնաւէտ գործընկերութիւնը՝ կողմերը կարեւորեցին երկխօսութիւնը եւ վերահաստատեցին պատրաստակամութիւնը՝ ընդլայնելու համագործակցութիւնը գրադարանային ոլորտին վերաբերող շարք մը արդիական ուղղութիւններով։