Հայաստանի ազգային գրադարանէն ներս «Խորհուրդ կու տան հրատարակիչները» շարքի հերթական հանդիպումը Արեւիկ հրատարակչութեան (Arevik Publishing) հետ էր։ Հրատարակչութեան տնօրէն Սապէթ Յովհաննիսեանը ներկայացուց հրատարակչութեան ընթացիկ գործունէութիւնը, նորաբաց Արեւիկ գրատուն (Arevik Bookstore) ծրագիրները եւ վերջին հրատարակութիւնները, որոնք այսօր մեծ հետաքրքրութիւն կը վայելեն։ Հանդիպման մասնակցեցան Հայաստանի մարզերու եւ Երեւանի համայնքային շարք մը գրադարաններու ներկայացուցիչներ, ինչպէս նաեւ ընթերցողներ։

Նոր գիրքեր եւ թարմացուած շարքեր

«Երեւակայութեան կղզի» շարքը համալրուած է գերմանահայ մանկավարժ Ռուզաննա Դանիէլեանի երեք նոր հեքիաթներով․

- «Ռուփին՝ հարիւրերորդ ոչխարը». պատմութիւն մանկական վախերու յաղթահարման մասին։

- «Փորժեթա Պլու. Փոքրիկ Հապալասադդմիկը». բազմազանութեան, հանդուրժողութեան եւ ինքնութիւնը սիրելու մասին։

- «Ծեր արագիլ Փաուլուսն ու անոր առաքելութիւնը». ընտանիքի արժէքի մասին յուզիչ պատմութիւն։

Սոնա Աբգարեանի «Պառաւի ուլերը». ժամանակակից քաղաքային երեւակայութիւն, ուր իրականութիւնն ու յօրինուածքը միահիւսուած են ազատութեան, արդարութեան եւ մարդկային յարաբերութիւններու շուրջ գաղափարներով։ Նկարազարդումներն ու գրութիւնը միասին կը կառուցեն պատմութեան ամբողջ ուժը։ «Ամպիկը, որ չէր կրնար անձրեւել». փոքրիկ ամպիկի մը պատմութիւնը, որ կորսնցուցած էր իր սիրելի ընկերը եւ կը դժուարանար կատարել կեանքի իր կարեւոր առաքելութիւնը՝ անձրեւել։ Գիրքը կը պատմէ կորուստը յաղթահարելու, նոր ընկերութիւններ հաստատելու եւ կեանքի ուրախութիւնը վերագտնելու մասին։

Նոյն շարքի ջերմ պատմութիւններէն է նաեւ «Տորմէ պապիկը», որ կը ցուցադրէ, թէ ինչպէս փոքրիկ եւ սովորական բաները՝ տուրմը, նուէրը, կամ անսպասելի արկածները կրնան դառնալ մեծ ընկերութեան եւ երեւակայութեան աղբիւր։ «Տարեմուտի խաղերու մեծ գիրքը». վերջին հրատարակութիւնն է, ամէնէն թարմը, ընտանեկան ձմեռնային ժամերը ջերմացնելու համար՝ տօնական խաղերով ու հետաքրքրական յանձնարարութիւններով, որոնք կը միաւորեն ընտանիքի բոլոր անդամները։ «Փոքրիկ ճամբորդները» շարքը համալրուած է նոր քաղաքներով՝ 🇪🇸 Պարսելոնա, 🇬🇧 Լոնտոն, ինչպէս նաեւ շարքի սիրելի՝ 🇮🇹 Հռոմը եւ 🇫🇷 Փարիզը։ Գիրքերը պատմութիւններ ու խաղեր կը պարունակեն, որոնք կ’օգնեն երեխաներուն ճանչնալ տարբեր քաղաքներու մշակոյթները եւ ինչո՞ւ ոչ՝ օգնական կը հանդիսանան ճանապարհորդութիւններու ժամանակ։ «Փոքրիկ Քոքո Շանէլը». պատմութիւն Քոքո Շանէլի մանկութեան եւ երազին հաւատարիմ մնալու մասին, որ կրնայ փոխել ընթերցողին աշխարհը։ «Սերմիկը» գիրքը կը պատմէ կեանքի ամբողջ ընթացքի մասին՝ սերմիկ ըլլալէն մինչեւ սերմիկներ տալը։ Գրուածքի իւրայատուկ ոճն ու գեղեցիկ պատկերները միասին կը զարգացնեն երեխաներու լեզուամտածողութիւնն ու երեւակայութիւնը՝ բանալով անոնց առջեւ նոր աշխարհներ եւ հեռանկարներ։ «Անձնուէր ծառը» գիրքը կը սորվեցնէ երեխային սիրել։ Կը սկսի ծնողին ու զաւակին սիրելէն, ապա կ’անցնի բնութեան եւ մարդու միջեւ անշահախնդիր սիրոյ, նուիրելու եւ անկէ բերկրանք ապրելու կարեւոր պատմութիւններ։

Մեծ պահանջ ունեցող գիրքեր

Հրատարակչութեան ղեկավարը նշեց, որ ընթերցողներու շրջանէն ներս մեծ տարածում ունին՝ երաժշտական ձայնագիրքերը՝ «Իմ առաջին մեղեդիները» շարքը (Վիւալտի, Մոցարթ, Կոմիտաս, Արամ Խաչատուրեան), ճանաչողական գիրքեր՝ «Հայաստանը ափի մէջ», «Դրօշներ», «Իմ գործիքներու պայուսակը», յայտնի երեւակայական եւ արկածային թարգմանութիւններ՝ «Նարնիայի ժամանակագրութիւնները», «Միսս Փերեկրինի իւրայատուկ երեխաներու տունը» եւ այլն... Հանդիպման աւարտին մասնակիցներուն յանձնուեցան «Արեւիկ» հրատարակչութեան ամանորեայ յուշանուէր-գիրքերու օրինակներ։