Հայաստանի հանրային գրադարաններէն ներս ամէնէն շատ սպասարկուած գեղարուեստական գիրքերուն ամէնամսեայ ցուցակներուն վրայ անշարժ եւ շարժական մասեր կան։ Իրականութեան մէջ անշարժ մասի գրքերը ամէնէն յաճախը կը շարժին։ Ատոնք մեր դասական հեղինակներն են, որոնց գործերը ընդգրկուած են ուսումնական ծրագիրներուն մէջ, ուստի եւ ամէնէն շատը կը սպասարկուին ընթերցողներուն։

Աւելի պճռական եւ անկանխատեսելին ցուցակին շարժական մասն է։ Ամէնէն շատ սպասարկուած գիրքերու ցուցակներուն վրայ իւրաքանչիւր ամիս նոր անուններ, նոր հեղինակներ կը յայտնուին, որոնց գիրքերը ձեռնոց կը նետեն հայ եւ համաշխարհային դասական գրողներուն։ Այդ հեղինակները երբեմն ասուպի պէս կը շողարձակեն եւ կ’անցնին գրականութեան երկնակամարով։ Որոշ գիրքեր աւելի երկար կը մնան գրադարանային տասնեակներուն մէջ։ Կան նաեւ գիրքեր, որոնք տեւական լռութենէն եւ գրադարանային գրապահոցներուն մէջ մոռացութեան մատնուելէ ետք ընթերցողներուն կամքով կրկին կը «վերակենդանան»։

Ողջ տարին ընթերցողներու բարձր պահանջարկ ունին Րաֆֆիի «Խենթը» եւ «Սամուէլը», Թոթովենցի «Կեանքը հին հռովմէական ճանապարհին վրայ» վիպակը, Շիրուանզադէի «Քաոսը», Մահարիի «Մանկութիւն» եւ «Պատանեկութիւնը», Նար Դոսի «Սպանուած աղաւնին» եւ պատմուածքները։ Արտասահմանեան հեղինակներու ամէնէն պահանջուած գիրքերէն Ճորճ Օրուէլի «1984», Շարլոթ Պրոնթէի «Ճէյն Էյր», Խալետ Հոսէյնիի «Օդապարուկ թռցնողը», Ժոզէ Սարամակուի «Մահուան ընդհատումներ», Հերման Հեսսէի «Տափաստանի գայլը», Էլենա Ֆերանթէի «Իմ հանճարեղ ընկերուհին», Ալեքս Մայքլիտիսի, Ռեմարքի, Ակաթա Քրիստիի վէպերը։

Հանրապետութեան ամէնէն պահանջուած գեղարուեստական գիրքերու տասնեակի կազմին մէջ այս ամիս մասնակցած են բոլոր 10 մարզային գրադարանները, Սպիտակի եւ Ստեփանաւանի քաղաքային, Վետիի համայնքային, ինչպէս նաեւ Երեւանի Իսահակեանի անուան քաղաքային եւ Աջափնեակի Շարլ Ազնաւուրի անուան գրադարանները։