">

Սեպտեմբեր 9-ին, ժամը 11։00-ին, «Հայաստանի Ազգային Գրադարան» ՊՈԱԿ-ի վարչական մասնաշէնքին առաջին յարկին վրայ տեղի պիտի ունենայ նոր՝ «Աջակից ընթերցասրահ»-ի բացման արարողութիւնը։ «Աջակից ընթերցասրահ»-ը ստեղծուած է ամերիկահայ գրադարանավար Ծիածան (Ճիա) Այվազեանի կտակին համաձայն՝ որպէս յատուկ ծրագիր Հայաստանի Ազգային Գրադարանի սահմանափակ կարողութիւններ ունեցող ընթերցողներուն համար։

Նոր ընթերցասրահին ստեղծումը կարեւոր քայլ մըն է գրադարանային ծառայութիւնները աւելի ներառական եւ մատչելի դարձնելու ուղղութեամբ։ Անիկա հնարաւորութիւն պիտի ընձեռէ հենաշարժական խնդիրներ եւ ֆիզիքական սահմանափակումներ ունեցող, կոյր եւ թոյլ տեսողութեամբ, ինչպէս նաեւ տպագիր նիւթեր կարդալու դժուարութիւններ ունեցող՝ դիսլեքսիա, հիպերլեքսիա, ալեքսիա եւ այլ առանձնայատկութիւններ ունեցող անձերուն օգտուելու Հայաստանի Ազգային Գրադարանի տարածքէն եւ գրականութեան պաշարներէն՝ իրենց կարիքներուն համապատասխան մատչելի ձեւաչափերով։ Ընթերցասրահը համալրուած պիտի ըլլայ ձայնագրքերով, Պրայլեան գրատիպով եւ այլընտրանքային ձեւաչափերով հրատարակութիւններով, ինչպէս նաեւ ժամանակակից արհեստագիտական լուծումներով։ Այս միջոցները պիտի նպաստեն յատուկ կարիքներ ունեցող ընթերցողներուն համար գրադարանային ծառայութիւններու աւելի մատչելի, յարմարաւէտ եւ արդիւնաւէտ կազմակերպման։

«Աջակից ընթերցասրահ»-ի նպատակն է ստեղծել այնպիսի միջավայր մը, ուր իւրաքանչիւր ընթերցող, անկախ իր ֆիզիքական կարողութիւններէն կամ ընթերցանութեան առանձնայատկութիւններէն, կարենայ ազատօրէն օգտուիլ գրադարանի պաշարներէն, կրթական եւ մշակութային հնարաւորութիւններէն։ Բացման արարողութեան պիտի մասնակցին սահմանափակ կարողութիւններ ունեցող անձեր, Ծիածան (Ճիա) Այվազեանի ընտանիքի անդամները, ՀՀ Կրթութեան, Գիտութեան, Մշակոյթի եւ Սփիւռքի նախարարութեան ներկայացուցիչներ, ինչպէս նաեւ Հայաստանի Ազգային Գրադարանի աշխատակիցներ, գործընկերներ եւ հրաւիրուած հիւրեր։

«Աջակից ընթերցասրահ»-ի բացումը կարեւոր նշանակութիւն ունի Հայաստանի Ազգային Գրադարանի՝ ներառականութեան, հաւասար հասանելիութեան եւ ժամանակակից գրադարանային ծառայութիւններու զարգացման ուղղուած քաղաքականութեան ծիրէն ներս։ Հայաստանի Ազգային Գրադարանը կը շարունակէ իր գործունէութեան ծիրէն ներս զարգացնել այնպիսի միջավայր եւ ծառայութիւններ, որոնք գրադարանը հասանելի կը դարձնեն հասարակութեան բոլոր խումբերուն։