ՀԱՅԱՍՏԱՆԻ ԱԶԳԱՅԻՆ ԳՐԱԴԱՐԱՆ
-
Արեւմտահայերէն
Հեռախոսահամար
Արեւմտահայերէն
փտր 07, 2025 Նորութիւններ
Տպագիր արտադրանքի վերականգնումը եւ նորոգումը մշակութային ժառանգութեան պահպանման առաջնային միջոցներէն է։ Գիրքերը, ձեռագիրները եւ տպագիր փաստաթուղթերը կ'ենթարկուին ժամանակի, լոյսի, խոնաւութեան ազդեցութեան կամ կը վնասուին սպասարկման ժամանակ։ Վերականգման գործընթացը կը ներառէ գրականութեան էջերու մաքրում, պատռուածքներու ամրացում, նոր կազմի պատրաստում կամ բնօրինակի վերակառուցում՝ յատուկ նիւթերու եւ արհեստագիտութեանց կիրառումով։
Վերականգնուած տպագիր արտադրանքը ոչ միայն կը պահպանէ իր պատմական արժէքը, այլեւ կը շարունակէ հասանելի ըլլալ ապագայ սերունդներուն համար՝ պահպանելով ժառանգութեան շարունակականութիւնը։
Դեկտեմբեր 18-ին Հայաստանի ազգային գրադարանի տպագիր արտադրանքի վերականգման բաժնի վարիչ Վարդուհի Գէորգեանը վերապատրաստման միօրեայ դասընթաց կազմակերպեց խումբ մը գրադարանավարներու համար։ Ան ներկայացուց պահոցներու լուսաւորութեան, ախտահանութեան եւ գիրքերու ճիշդ դասաւորման կարեւորութիւնը, պատմեց, թէ ինչպէս կը խնամեն եւ կը փոշեհանեն գիրքերը, ինչպէս հասկնալ հիւանդ միաւորներու ախտանշանները, վերականգնել եւ պահպանել զանոնք։ Գործնական աշխատանքը նուիրուած էր գիրքերու դասական վերականգման։
Նման դասընթացները շատ կարեւոր են, քանի որ ատոնք կ'օգնեն պահուստային բաժիններուն ժամանակին բացայայտելու գիրքերու պահպանութեան եւ խնամքի հետ կապուած խնդիրները, ինչպէս նաեւ անհրաժեշտ հմտութիւններ եւ գիտելիքներ կը փոխանցեն երիտասարդ անձնակազմերուն։
