Մետիագրագիտութեան նոր նախաձեռնութիւններն ու հետաքրքրական ծրագիրները դեռ առջեւն են: Ամփոփուեցաւ մետիագրագիտութեան եռօրեայ դասընթացը, որ կազմակերպուած էր Մետիա նախաձեռնութիւններու կեդրոնի (Media Initiatives Center) նախաձեռնութեամբ՝ Հայաստանի Կրթութեան, գիտութեան, մշակոյթի եւ մարմնամարզութեան նախարարութեան հետ համատեղ՝ նպատակ ունենալով զարգացնել գրադարանավարներու մետիագրագիտութեան հմտութիւնները եւ խթանել մետիագրագիտութեան մշակոյթի տարածումը գրադարանային միջավայրին մէջ։

Դասընթացին Հայաստանի ազգային գրադարանէն կը մասնակցէր Հանրային կապերու բաժնի վարիչ Արմինէ Վարդանեանը, ինչպէս նաեւ Խնկոյ Ախպոր անուան ազգային մանկական, Երեւանի Աւետիք Իսահակեանի անուան քաղաքային եւ հանրապետութեան տասը մարզային գրադարաններէն ներկայացուցիչներ։ Դասընթացը կը վարէին մետիագրագիտութեան փորձագէտ Լուսինէ Գրիգորեանը, Մետիա նախաձեռնութիւններու կեդրոնի մետիագրագիտութեան մասնագէտ Անի Եղիազարեանը եւ նոյն կեդրոնի «Media.am» կայքի խմբագիր Գեղամ Վարդանեանը։

Եռօրեայ խտացեալ ծրագրի ընթացքին մասնակիցները ծանօթացան մետիագրագիտութեան հիմնական սկզբունքներուն, քննադատական մտածողութեան զարգացման մեթոտներուն, փաստերու ստուգման գործիքներուն, թուային անվտանգութեան կանոններուն, ինչպէս նաեւ արհեստական բանականութեան կիրառման հնարաւորութիւններուն մետիայի եւ գրադարանային աշխատանքի մէջ։ Դասընթացի աւարտին մասնակիցները ստացան հաւաստագիրներ, սակայն ասիկա միայն սկիզբն է․ յառաջիկային անոնք պիտի շարունակեն ստացուած գիտելիքներու կիրառումն ու տարածումը՝ իրենց գրադարաններուն մէջ խթանելով մետիագրագիտութեան զարգացումը ինչպէս աշխատակիցներու, այնպէս ալ ընթերցողներու շրջանէն ներս։