2025 թուականի նոյեմբերին Եունեսքոյի գլխավոր համաժողովը պաշտօնապէս ճանչցած է փետրուար 9-ն՝ Յունարէնի համաշխարհային օր, որ սահմանուած էր դեռեւս 2017 թուականին՝ ընդգծելով յունարէնի նշանակալի դերը համաշխարհային մշակութային եւ կրթական ժառանգութեան ծիրէն ներս։

Փետրուար 9-ին Հայաստանի ազգային գրադարանի մեծ դահլիճին մէջ կայացաւ Յունարէնի համաշխարհային օրուան նուիրուած հանդիսաւոր միջոցառումը՝ «Յունարէնը եւ երաժշտութիւնը. երեք եւ աւելի հազարամեակներու կենդանի աւանդոյթ» խորագրով։ Անիկա կազմակերպուած էր Հայաստանի մէջ Յունաստանի դեսպանութեան նախաձեռնութեամբ եւ Հայաստանի ազգային գրադարանի աջակցութեամբ: Ներկայացուեցաւ իւրօրինակ մշակութային ճամբորդութիւն մը՝ լեզուի, երաժշտութեան եւ պատմական յիշողութեան ընդմէջէն։Միջոցառման ողջոյնի խօսքով հանդէս եկան Հայաստանի մէջ Յունաստանի արտակարգ եւ լիազօր դեսպան Խրիստոս Սոֆիանոփուլոսը եւ Հայաստանի ազգային գրադարանի տնօրէն Աննա Չուլեանը՝ ընդգծելով յունարէնի դերը համաշխարհային մշակութային ժառանգութեան պահպանման եւ միջմշակութային երկխօսութեան խորացման գործին մէջ։

Միջոցառման հիմնական բանախօսն էր Քափոտիսթրիայի անուան Աթենքի ազգային համալսարանի ժողովրդական երաժշտագիտութեան վաստակաւոր փրոֆեսոր Լամպրոս Լիաւասը, որուն ելոյթը նուիրուած էր յունարէնի եւ երաժշտութեան անքակտելի կապին։ Խօսքի եւ երաժշտական օրինակներու միջոցաւ ան ներկայացուց, թէ ինչպէ՛ս յունարէնը երեք եւ աւելի հազարամեակներու ընթացքին փոխանցած է յոյզեր, արժէքներ ու յիշողութիւններ՝ դառնալով կենդանի աւանդոյթ եւ մշակութային ինքնութեան առանցք։