✔ Ֆրանսախօսութեան երկամսեակին նուիրուած միջոցառումներու ծրագրի շրջանակէն ներս ապրիլ 7-ին Հայաստանի ազգային գրադարանէն ներս տեղի ունեցաւ նշանակալի մշակութային իրադարձութիւն մը՝ նուիրուած «Ակտուալ արուեստ» հրատարակչութեան 30+1-ամեակին։ Գրադարանի նախագահական սրահին մէջ բացուեցաւ հրատարակչութեան գրականութեան ցուցադրութիւնը, ուր ներկայացուած էին տարիներու ընթացքին լոյս տեսած կարեւոր եւ արժէքաւոր հրատարակութիւնները։

✔ «Ակտուալ արուեստ»-ը մշակութային լրատուական կազմակերպութիւն մըն է, որ այսօր հրատարակչական գործունէութենէն բացի նաեւ կը նպաստէ ժամանակակից արուեստի, մշակոյթի եւ մտաւոր դաշտի զարգացման Հայաստանի մէջ։ Հրատարակչութիւնը ձեւաւորած է իր առանձնայատուկ ձեռագիրը՝ ընթերցողին ներկայացնելով ոչ միայն գեղարուեստական, այլեւ տեսական, արուեստաբանական եւ քննադատական նշանակութիւն ունեցող գիրքեր։

✔ Միջոցառման շրջանակէն ներս կայացաւ նաեւ «Ակտուալ արուեստ» հանդէսի «Պարոք / Baroque» համարի #24(30) շնորհանդէսը։ Հանդէսի գլխաւոր խմբագիրներն են Լեւոն Կիւլխասեանը, Անի Եղիազարեանը, Դաւիթ Մոսինեանը եւ Վարդան Ֆերեշեթեանը, իսկ հրատարակչութեան ղեկավարն է Մկրտիչ Մատթէոսեանը։ Սոյն համարի նախաձեռնողը Վազգէն Պահլաւունի-Թադէոսեանն է՝ Վազոն, իսկ գլխաւոր «հիւրը»՝ երաժշտագէտ Արաքս Շահինեանը։ Հանդէսը կը տպագրուի ՀՀ Կրթութեան, գիտութեան, մշակոյթի եւ մարմնամարզութեան նախարարութեան աջակցութեամբ։

✔ «Պարոք» համարը կը տարբերի իր բովանդակային եւ պատկերային հարստութեամբ, Վազոյի հեղինակած բազմաթիւ յօդուածներուն զուգահեռ, ընթերցողին կը ներկայացնէ նաեւ լայնածաւալ պատկերազարդ նիւթ՝ պարոք արուեստի եզակի նմուշներու վերատպութիւններով, ծանօթ ու քիչ ծանօթ նկարիչներու գործերով։

Այս պատկերային շտեմարանը ձեւաւորուած է Վազոյի անձնական արուեստանոցային արխիւէն, ուրկէ առանձնացուած էջերը յատուկ այս համարին համար Ֆրանսայէն տեղափոխուած են Գիւմրի՝ ընտրութեան եւ հրատարակութեան նպատակաւ։ Ինչպէս իր խօսքին մէջ նշեց հրատարակչութեան ղեկավար Մկրտիչ Մատթէոսեանը, նիւթերու այդ ծաւալը պատկերացնելու համար բաւական է նշել, որ տեղափոխուած էջերու ընդհանուր ծանրոցը կազմած է շուրջ 12 քիլոկրամ, ինչ որ արժանացած է ոչ միայն զարմանքի, այլեւ խորին երախտագիտութեան։

✔ Ցուցահանդէսին յաջորդեց «Պարոք» հանդէսի քննարկումը, որու ընթացքին բանախօսներ Շուշան Հիւսնունցը, Դաւիթ Մոսինեանը եւ Արաքս Շահինեանը անդրադարձան հանդէսի բովանդակային առանձնայատկութիւններուն, անոր մշակութային արժէքին եւ արդիականութեան։ Անոնք ընդգծեցին, որ «Պարոք»-ը ոչ միայն ուղղուածութիւններ ունեցող հանդէս է, այլեւ իւրայատուկ հարթակ մըն է՝ արուեստի տարբեր դրսեւորումներու, պատմական շերտերու եւ ժամանակակից ընկալումներու միջեւ երկխօսութիւն ստեղծելու համար։

Քննարկումին ընթացքին յատուկ շեշտուեցաւ նաեւ հանդէսի կարեւորութիւնը՝ որպէս գիտական եւ ստեղծագործական նիւթերու համադրման օրինակ, ուր տեսական վերլուծութիւնը կը զուգորդուի հարուստ պատկերային նիւթի հետ՝ ընթերցողին առաջարկելով բազմաշերտ եւ ամբողջական փորձառութիւն։ ✔ Միջոցառման ընթացքին Հայաստանի ազգային գրադարանի տնօրէնուհի Աննա Չուլեանը, ներկայացնելով «Ակտուալ արուեստ»-ի եւ Գրադարանին միջեւ ձեւաւորուած ջերմ ու արդիւնաւէտ համագործակցութիւնը, ընդգծեց, որ Մկրտիչ Մատթէոսեանը եւ «Ակտուալ արուեստ»-ը կարեւոր դերակատարութիւն ունին նաեւ Ազգային գրադարանի Գրատպութեան թանգարանի ձեւաւորման գործին մէջ, ինչպէս նաեւ ՀԱԳ 105-ամեակին առթիւ բացուած Գրադարանի պատմութեան թանգարանի ինքնատիպ ձեւաւորման մէջ։ Ան նաեւ նշեց, որ Մկրտիչ Մատթէոսեանը ՀԱԳ-ի նոր տարբերանշանի հեղինակն է, որ լայն արձագանգ գտած է ոչ միայն Հայաստանի, այլեւ միջազգային գործընկերներու շրջանակէն ներս։

✔ Խորհրդանշական օրուան առթիւ Հայաստանի ազգային գրադարանը հանդէս եկաւ արդիական նուէրով. Հայաստանի գրադարաններու համահաւաք գրացուցակին մէջ բացուած է «Ակտուալ արուեստ» հրատարակչութեան առանձին հաւաքածոն, ուր մէկ յղումով ներկայացուած են հրատարակչութեան բոլոր գիրքերը՝ շուրջ 225 անուն. https://is.gd/h93P7e: ✔ Միջոցառումը անգամ մը եւս ընդգծեց «Ակտուալ արուեստ» հրատարակչութեան կարեւոր դերակատարութիւնը հայ մշակութային կեանքին մէջ՝ որպէս հարթակ մը, ուր կը միահիւսուին ժամանակակից միտքը, արուեստը եւ գիտական մօտեցումները։