Սեպտեմբեր 30-էն Հոկտեմբեր 2, Հայաստանի ազգային գրադարանը պիտի հիւրընկալէ «Ելեկտրոնային տեղեկատուութիւն գրադարաններու համար» (EIFL) տարեկան յանձնաժողովը, որուն պիտի մասնակցին 48 երկրներու գրադարանային ոլորտի եւ շարք մը գիտական հրատարակչութիւններու ներկայացուցիչներ (Oxford University Press, Cambridge University Press, Brill, JSTOR, EBSCO, Sage, The Company of Biologists եւ այլն)։

«EIFL»-ը միջազգային ոչ առեւտրային կազմակերպութիւն մըն է, որ կը գործէ Ափրիկէի, Ասիոյ եւ Խաղաղովկիանոսեան, Եւրոպայի զարգացող եւ անցումային տնտեսութեամբ երկրներու մէջ։ Կազմակերպութեան նպատակն է ապահովել գիտելիքի եւ տեղեկատուութեան հասանելիութիւնը, ինչպէս նաեւ աջակցիլ կրթութեան, գիտութեան, հետազօտութիւններու եւ կայուն համայնքային զարգացման։ Համաժողովին պիտի մասնակցին «EIFL»-ի հետ համագործակցող երկրներու գրադարանային ընկերակցութիւններու ներկայացուցիչները, ներառեալ՝ Հայաստանի թուային գրադարաններու ընկերակցութեան անդամակցող, ինչպէս նաեւ ակադեմական տարբեր գրադարաններու ներկայացուցիչները։

Համաժողովի շրջանակէն ներս «EBSCO Information Services» ընկերութեան ներկայացուցիչները սեմինար մը պիտի իրականացնեն Հայաստանի տարբեր գրադարաններու մասնագէտներուն համար՝ ներկայացնելով ելեկտրոնային պաշարներու հետ աշխատանքի լաւագոյն փորձը։ Համաժողովի նպատակն է խթանել մասնակից երկրներու գիտական ու հետազօտական յառաջընթացը՝ ստեղծելով մասնագիտական գիտելիքներու եւ փորձի փոխանակման կարեւոր միջազգային հարթակ գրադարանային եւ ակադեմական ոլորտներու ներկայացուցիչներուն համար։