Հայաստանի ազգային գրադարանէն ներս այս պահուն կը ցուցադրուի Սինէ-ակումբին հերթական ֆիլմը՝ ֆրանսական նոր ալիքի յառաջատար ներկայացուցիչ Քլոտ Շապրոլի գլուխգործոց «Կնոջ գործը»` Իզապէլ Եուփէրի փայլուն գլխաւոր դերակատարութեամբ։ Ֆիլմը ներկայացնելու ատեն Սինէ-ակումբի համակարգող Արթուր Վարդիկեանը ընդգծեց, որ ասիկա Քլոտ Շապրոլի՝ ֆիլմի ակումբին մէջ ցուցադրուող երրորդ ֆիլմն է՝ «Գեղեցիկ Սերժ»-էն եւ «Արարողութիւն»-էն ետք։

Եուփէրի մարմնաւորած ողբերգական կերպարը գոյատեւման, անկախութեան ձգտման եւ յայտնաբերուելու մշտական վախի մթնոլորտին մէջ կը նաւարկէ մութ ովկիանոսին մէջ, ուր զոհի եւ յանցագործի դերերը կը միահիւսուին: Ֆիլմին հիմքը Մարի-Լուիզ Ժիրոյի իրական պատմութիւնն է, որ 1943-ի յուլիս 30-ին կառափնատով գլխատուեցաւ Շերպուրի շրջանին մէջ՝ 27 անօրինական յղիութեան ընդհատում (վիժում) իրագործելուն համար։

Եուփէրը այս ֆիլմին համար արժանացաւ Վենետիկի ֆիլմի փառատօնի Վոլփի բաժակին։ Շապրոլը, Եուփէրը եւ Մարի Թրանթինեանը ֆիլմին համար Սեզար ստացան։ Ֆիլմը դարձաւ Շապրոլի 1980-ականներու ամէնէն նշանակալից ստեղծագործական յաջողութիւնը։ Սինէ-ակումբը Հայաստանի ազգային գրադարանին մէջ կը գործէ արդէն երրորդ տարին ըլլալով «Ֆիլմադարան» ֆիլմի մշակոյթի զարգացման հասարակական կազմակերպութեան, Ազգային գրադարանի, Հայաստանի մէջ Ֆրանսայի դեսպանութեան Ֆրանսական հիմնարկի համագործակցութեամբ ֆիլմասէրներուն ներկայացնելով ֆրանսական ֆիլմերու ընտրանի մը։ Ֆիլմերը կը ցուցադրուին ֆրանսերէնով՝ հայերէն եւ անգլերէն ենթագրերով։