Նոր ֆրանսական ֆիլմի յառաջատար դէմքերէն մէկուն՝ Լուի Մալի «Լիլուն մայիսին» կատակերգութիւնը ցուցադրուեցաւ Հայաստանի ազգային գրադարանէն ներս՝ ՀԱԳ-ի, Ֆրանսայի դեսպանատան, Ֆրանսական հիմնարկի եւ Ֆիլմադարանի հետ համատեղ կազմակերպուող ամէնշաբաթեայ ֆիլմի ակումբի շրջանակէն ներս: 

«Սինէ-ակումբի» համակազմակերպիչ, ֆիլմագէտ, բեմադրիչ Գարեգին Զաքոյեանի բնորոշմամբ՝ կատակերգութեան ժանրին դասուած այս ֆիլմը նոյնքան լուրջ է, որքան Շեքսփիրի կատակերգութիւնները, որքան լուրջ չեն կրնար ըլլալ «լուրջի» յաւակնող շատ ֆիլմեր: Բաւական է միայն նշել, որ լուսաւոր տխրութեամբ լեցուն հեգնոտ ու զուարճալի այս ֆիլմի բեմագրութեան հեղինակներն են Լուի Մալը ինքը եւ ֆրանսացի բեմագիր, թատերագիր, գրող, դերասան, Լուիս Պունիուէլի եւ Միլոշ Ֆորմանի ֆիլմերու բեմագիր Ժան Քլոտ-Քարիէրը, որ հայ ընթերցողին ծանօթ է «Յոյս չունենաք, թէ կ’ազատիք գիրքերէն»՝ Ումպերթո Էքոյի հետ զրոյցներու գրքէն:

Գլխաւոր դերակատարը, ինչպէս միշտ, փայլող Միշէլ Փիքոլին է, դերակատարներէն մէկն ալ ֆրանսահայ դերասան Ֆրանսուա Պերլեանն է: Միլուի մօր՝ գերդաստանին մեծ մօր դերը Փոլեթ Տիուպոն է՝ յայտնի յատկապէս Ժան Ռենուարի «Խաղի կանոնները» ֆիլմէն: