Չինական Նոր տարին այս տարի կը նշուի յունուար 29-ին։ Չինական Նոր տարին չինական լուսնային օրացոյցի ամէնէն կարեւոր տօնն է։ Խորհրդանշական է, որ այսօր Ազգային գրադարանի հաւաքածոն հարստացաւ 22 միաւոր հայ հեղինակներու, հայ մշակոյթի, արուեստի եւ հայագիտական թեմաներով չինարէն գրականութեամբ։ Գիրքերը գրադարանին է նուիրած գրադարանի աջակից եւ բարեկամ Ճի Կոուչինը։

2024 թուականի հոկտեմբեր 29-ին Ճի Կոուչինը՝ Ազգային գրադարանին մէջ մասնակցելով Չինաստանի Ժողովրդական Հանրապետութեան հիմնադրման 75-ամեակին նուիրուած ցուցահանդէսի բացման, նախաձեռնած է իր ներդրումը ունենալ գրադարանի չինարէն հաւաքածոյի հարստացման գործին մէջ։

Այսօր գրադարանի գլխաւոր ընթերցասրահի Չինական անկիւնին մէջ գրադարանի տնօրէնուհի Աննա Չուլեանը եւ Ճի Կոուչինը ներկայացուցին նուիրատուութիւնը։ Գիրքերու շարքին են «Սասունցի Դաւիթ» դիւցազնավէպը, Մովսէս Խորենացիի «Հայոց պատմութիւնը», Վախթանգ Անանեանի «Սեւանի ափին» վէպը, հայ ժողովրդական հեքիաթներ եւ այլ գիրքեր։

Գիրքերը եւ թարգմանական գրականութիւնը իւրայատուկ կամուրջներ կը հանդիսանան, որոնք կը կապեն ժողովուրդներուն միջեւ։ Գիրքերը կ՚օգնեն աւելի լաւ ճանչնալու մեզ շրջապատող աշխարհը եւ մեր բարեկամները։