Ժան Միշէլ Թիերիի ծննդեան 110-ամեակին նուիրուած ցուցադրութիւն Ազգային գրադարանէն ներս. Հայաստանի ազգային գրադարանի արուեստի բաժնէն ներս բացուած է ֆրանսացի նշանաւոր բժիշկ, արուեստաբան եւ հայագիտութեան նուիրեալ հետազօտող Ժան Միշէլ Թիերիի ծննդեան 110-ամեակին նուիրուած գրականութեան ցուցադրութիւն։ Միջոցառման շրջանակէն ներս բաժնի վարիչ Յասմիկ Առաքելեանը հանդէս եկաւ զեկոյցով՝ ներկայացնելով Թիերիի բացառիկ ներդրումը հայկական ճարտարապետութեան ուսումնասիրման, փաստագրման եւ միջազգային հանրահռչակման գործին մէջ։

Ժան Միշէլ Թիերին այն եզակի անհատներէն էր, որ, ծնած ըլլալով Ֆրանսա, իր կեանքի աւելի քան հինգ տասնամեակը նուիրեց հայկական մշակութային ժառանգութեան պահպանութեան։ Իր եւ կնոջ՝ Նիքոլ Թիերիի համատեղ ջանքերով ուսումնասիրուեցան, չափագրուեցան եւ լուսանկարուեցան հարիւրաւոր յուշարձաններ՝ յատկապէս Արեւմտեան Հայաստանի մէջ, որոնք յաճախ կը գտնուէին կորուստի եզրին։ Թիերին մշակեց յուշարձաններու փաստագրման գիտական մեթոտաբանութիւն՝ համադրելով ճարտարապետական չափագրութիւնը, ուրուագիծերը եւ բարձրորակ լուսանկարչութիւնը։ Անոր աշխատութիւններուն շնորհիւ բազմաթիւ եկեղեցիներ «ձեռք բերին իրենց անձնագիրները» գիտական աշխարհին մէջ։

Ցուցադրութեան մէջ ներկայացուած են Թիերիի կարեւորագոյն աշխատութիւնները, որոնք մինչ օրս կը մնան հայ արուեստի ուսումնասիրութեան հիմնարար աղբիւրներ։ Ժան Միշէլ Թիերին ոչ միայն ուսումնասիրեց հայկական ճարտարապետութիւնը, այլ դարձաւ ատոր ամէնէն նուիրեալ ջատագովներէն մին՝ իր գիտական գործունէութեամբ պաշտպանելով եւ աշխարհին ներկայացնելով հայ մշակոյթի հարուստ ժառանգութիւնը։ Անոր թողած ժառանգութիւնը կը շարունակէ ոգեշնչել նոր սերունդներու հետազօտողները՝ յիշեցնելով, որ մշակութային արժէքներու պահպանումը ոչ միայն գիտական աշխատանք է, այլեւ առաքելութիւն։