2023 թուականի օգոստոս 31-ին, Հայաստանի ազգային գրադարանի թամանեանական մեծ ցուցասրահէն ներս, Ուիլիամ Սարոյեանի ծննդեան օրը բացուեցաւ մեծ գրողին ստեղծագործութիւններուն, անոր մասին գրականութեան եւ ոչ գրքային հրատարակութիւններու, մասնաւորապէս, բացառիկ նկարատետրերու ցուցադրութիւնը։ 

Ներկայացուած էին գրողին առաջին «Խիզախ պատանին թռչող ճօճաձողին» գիրքին՝ 1934-ի առաջին հրատարակութենէն մինչեւ 1979-ին անոր կենդանութեան օրօք լոյս տեսած վերջին գիրքը, անգլերէն բազմաթիւ այլ բնօրինակ արժէքաւոր հրատարակութիւններ, «Մարդկային կատակերգութիւն» երգաթատերագիրքը՝ բացառիկ հրատարակութիւն մը, Սարոյեանի գիրքերուն գերմաներէն, ֆրանսերէն, թրքերէն, ռումիներէն, լատուերէն, ռուսերէն թարգմանութիւնները, գրողին ինքնագիրով գիրքեր, անոր նամակները եւ շատ այլ նիւթեր։ 

Հայ իրականութեան մէջ ամէնէն շատ Սարոյեան թարգմանած Զաւէն Պոյաճեանը բարձր գնահատեց ցուցադրութիւնը եւ ուրախութեամբ պարզելով, որ Ազգային գրադարանէն ներս կան Սարոյեանի բնագրային՝ իրեն անհրաժեշտ գիրքերը: Ան ըսաւ, որ իր յետագայ թարգմանութիւններուն համար գրադարանէն փոխ պիտի առնէ զանոնք։ Ցուցադրութիւնը բաց էր մինչեւ սեպտեմբեր 25։