Հայաստանի մէջ Ուրուկուէյի Արեւելեան Հանրապետութեան Արտակարգ եւ լիազօր դեսպան Ն.Գ. տիկին Սիլվանա Լեսքա Պարոլինի գլխաւորած պատուիրակութիւնը աշխատանքային այցելութեամբ Հայաստանի ազգային գրադարանը կը գտնուէր։ Պատուիրակութեան կազմին մէջ էին նաեւ հիւպատոսական բաժնի ղեկավար Նիքոլաս Պրիթոսը եւ դեսպանի օգնական ու թարգմանիչ Սիրանոյշ Տիտիզեան Մալխասեանը։ Հայաստանի ազգային գրադարանի տնօրէնուհի Աննա Չուլեանի ուղեկցութեամբ պատուիրակութիւնը շրջայց կատարեց գրադարանի թամանեանական մասնաշէնքը, ծանօթացաւ գրադարանի հարուստ պատմութեան, գործունէութեան հիմնական ուղղութիւններուն, ինչպէս նաեւ ազգային գրաւոր ժառանգութեան պահպանման եւ հանրահռչակման աշխատանքներուն։

Հանդիպման ընթացքին քննարկուեցան հայ-ուրուկուէյական մշակութային, գրական եւ գիտակրթական համագործակցութեան զարգացման հնարաւորութիւնները, ինչպէս նաեւ երկկողմանի կապերու ընդլայնման ուղղուած հեռանկարային հնարաւոր նախաձեռնութիւնները։ Հայաստանի ազգային գրադարանի կողմէ հայ տպագիր ժառանգութեան քարտէսագրման եւ հաւաքագրման շարունակական գործընթացի ծիրէն ներս հանդիպումը կարեւոր հիմք հանդիսացաւ յետագայ համագործակցութեան հնարաւոր ուղղութիւններու նախանշման, մշակութային ու կրթական փոխանակումներու խթանման եւ փոխադարձ հետաքրքրութիւն ներկայացնող ծրագիրներու քննարկման համար։ Այցելութեան շրջանակէն ներս Հայաստանի ազգային գրադարանի Ընդհանուր ընթերցասրահին մէջ գործող ուրուկուէյական գրականութեան անկիւնը համալրուեցաւ նոր հրատարակութիւններով, ինչ որ եւս մէկ քայլ է երկու երկրներու մշակութային կապերու ամրապնդման եւ գրական ժառանգութեան փոխճանաչման ուղղութեամբ։