Պատմական գիտութեանց դոկտոր Հայկ Տեմոյեանը Հայաստանի ազգային գրադարանին նուիրած է «Հայ գործարար կեանքի պատմութեան պատկերագիրք» խորագրով հայերէն եւ անգլերէն գիրքերը: Ինչպէս գիրքին յառաջաբանին մէջ նշած է հեղինակը, գիրքը նուիրուած է ծնծղաներ արտադրող աշխարհահռչակ «Զիլճեան» ընկերութեան 400-ամեակին եւ նպատակ ունի տեսողական հարուստ նիւթի ընդգրկմամբ անդրադառնալու հայ գործարարութեան՝ դարերու ընթացքին կուտակած ժառանգութեան:

Շուրջ 700 լուսանկար պարունակող հրատարակութիւնը կը ներկայացնէ 16-20-րդ դարերու հայ վաճառականութեան եւ ձեռնարկատիրութեան պատմութեան տպաւորիչ էջերը, ի մի կը բերուին հայ գործարար կեանքի հարուստ անցեալին առնչուող վկայութիւններ, պատմութիւններ, նիւթական արժէքներ: Գիրքին մէջ ներառուած են հեղինակին անձնական հաւաքածոյի եզակի նմուշները, որոնք հրատարակուած են առաջին անգամ ըլլալով: Կարեւոր պատմական եւ պատմագիտական նիւթ ըլլալով՝ ատոնք աղբիւրագիտական մեծ նշանակութիւն ունին։

Ընթերցողը առիթ պիտի ունենայ ծանօթանալու հեղինակին եւ տարբեր հաստատութիւններու եւ մասնաւոր հաւաքածոներու մէջ պահուող հետաքրքրական իրերու, փաստաթուղթերու, լուսանկարներու հետ: Գրադարանի բարեկամ Հայկ Տեմոյեանը տարիներու ընթացքին Ազգային գրադարանի հաւաքածոները հարստացուցած է բազմաթիւ արժէքաւոր հրատարակութիւններով։