Պատմական գիտությունների դոկտոր Հայկ Դեմոյանը Հայաստանի ազգային գրադարանին է նվիրել «Հայ գործարար կյանքի պատմության պատկերագիրք» վերնագրով հայերեն և անգլերեն գիրքը: Ինչպես գրքի առաջաբանում նշում է հեղինակը, գիրքը նվիրված է ծնծղաներ արտադրող աշխարհահռչակ «Զիլջյան» ընկերության 400-ամյակին և նպատակ ունի տեսողական հարուստ նյութի ընդգրկմամբ անդրադառնալու հայ գործարարության՝ դարերի ընթացքում կուտակած ժառանգությանը:

Շուրջ 700 լուսանկար պարունակող հրատարակությունը ներկայացնում է 16-20-րդ դարերի հայ վաճառականության ու ձեռնարկատիրության պատմության տպավորիչ էջերը, ի մի են բերված հայ գործարար կյանքի հարուստ անցյալին առնչվող վկայություններ, պատմություններ, նյութական արժեքներ: Գրքում ներառված են հեղինակի անձնական հավաքածուի եզակի նմուշները, որոնք հրատարակվել են առաջին անգամ: Կարևոր պատմական ու պատմագիտական նյութ լինելով՝ դրանք աղբյուրագիտական մեծ նշանակություն ունեն։

Ընթերցողն առիթ կունենա ծանոթանալու հեղինակի և տարբեր հաստատություններում ու մասնավոր հավաքածուներում պահվող հետաքրքիր իրերի, փաստաթղթերի, լուսանկարների հետ: Գրադարանի բարեկամ Հայկ Դեմոյանը տարիների ընթացքում Ազգային գրադարանի հավաքածուները հարստացել է բազմաթիվ արժեքավոր հրատարակություններով։