Յուլիս 4-ին Հայաստանի ազգային գրադարանը նուէր ստացած է իտալացի ամէնէն նշանաւոր բանաստեղծներէն մէկուն՝ Թորքուաթո Թասսոյի «Ազատագրուած Երուսաղէմը» յայտնի ստեղծագործութեան ֆրանսերէն հրատարակութիւնը։ Թասսոյի դիւցազներգական բանաստեղծութեան մէջ հեղինակը ասպետական վէպերու օրինակով կը նկարագրէ Խաչակրաց առաջին արշաւանքի վերջաւորութեան՝ Երուսաղէմի պաշարման ժամանակ քրիստոնեաներուն մղած մարտերը մուսուլմաններուն դէմ։

Գիրքը տպագրուած է Փարիզի մէջ 1844 թուականին, սահմանափակ տպաքանակով։ Թորքուաթո Թասսոյի նշանաւոր բանաստեղծութիւնը արձակ շարադրանքով ֆրանսերէնի թարգմանած է ֆրանսացի գրող, երգահան եւ բանասէր Լուի Ֆիլիփոն տէ Լա Մատլէնը (կամ Ֆիլիփոն տէ Լա Մատլէն, 1734-1818)։ Գիրքին գունաւոր փայտափորագիր նկարազարդումները կատարած են 19-րդ դարու ֆրանսացի նկարիչներ Պարոնը եւ Սելեսթէն Նանթէյլը: Այս հետաքրքրական եւ հազուագիւտ հրատարակութիւնը գրադարանին նուիրած է հնատիպ եւ ֆրանսական գրականութեան լաւագոյն գիտակ, բ.գ.դ., փրոֆեսոր Նաթալիա Միքայէլի Խաչատրեանը: Շնորհակալ ենք արժէքաւոր նուէրին համար: