Հայաստանի ազգային գրադարանը վերջերս լրագրող Մարկ Գրիգորեանէն նուէր ստացաւ «Երեւանը 17-21-րդ դարերու քարտէսներուն վրայ» պատկերագիրքը՝ ըստ Ալեքսանդր Թամանեանի անուան Ճարտարապետութեան ազգային թանգարան-հիմնարկին մէջ 2023 թուականի նոյեմբեր-դեկտեմբերին կազմակերպուած համանուն ցուցահանդէսին։ Գիրքին հեղինակներն են Մարկ Գրիգորեանը եւ Արմինէ Սարգսեանը։

Ներկայացուած են ցուցանմուշներ Ճարտարապետութեան թանգարանի եւ Երեւանի պատմութեան թանգարանի հաւաքածոներէն, «Քոլաժ» հրատարակչութեան տրամադրած նիւթերէն, ինչպէս նաեւ Մարկ Գրիգորեանի, Հայկ Տեմոյեանի եւ Հայկ Թամանեանի անձնական հաւաքածոներէն։

Ցուցահանդէսի նախապատրաստական աշխատանքներուն աշխուժ մասնակցութիւն ունեցած է նաեւ Հայաստանի ազգային գրադարանը՝ իր հաւաքածոներէն քարտէսներու եզակի օրինակներ տրամադրելով։ Մասնաւորաբար՝ Ալեքսանդր Թամանեանի հեղինակած Երեւանի 1932 թուականի եւ Մ. Աստուածատուրեանցի հեղինակած Երեւանի 1920 թուականի յատակագիծերը։ Գիրքը ցոյց կու տայ քաղաքին զարգացումը՝ փոքր ամրոցէն մինչեւ միլիոնանոց մեծ քաղաք՝ Հայաստանի Հանրապետութեան մայրաքաղաքը։ Եռալեզու (հայերէն, անգլերէն, ռուսերէն) պատկերագիրքին մէջ զետեղուած են աւելի քան 40 եզակի քարտէսներ, գծագիրներ, ուրուագիծեր, Հայաստանի մայրաքաղաքին զարգացման գլխաւոր յատակագիծերը, քաղաքային ուղեցոյցներ, նաեւ պատմական Երեւանի լուսանկարներ, որոնք իրականացուած են գեղարուեստական եւ հրատարակչական բարձր արուեստով։ Պատկերագիրքին տպագրութեան հովանաւորներն են Երեւանի քաղաքապետարանը եւ Երեւանի «Արարատ» քոնեակի գործարանը։ Նուիրելով պատկերագիրքը՝ Մարկ Գրիգորեանը ջերմօրէն շնորհակալութիւն յայտնեց Ազգային գրադարանի տնօրէնուհի Աննա Չուլեանին՝ եզակի նիւթեր տրամադրելու եւ ցուցահանդէսի կազմակերպման գործին մէջ ցուցաբերած աջակցութեան համար։