Հայաստանի ազգային գրադարանի աշխատակիցներ Լուսինէ Լուլուկեանը, Արմինէ Մկրտչեանը եւ Սարա Զօհրապեանը մայիս 15-էն 27-ը Մոսկուայի եւ Քազանի մէջ մասնակցեցան միջազգային երկու կարեւոր ծրագիրներու։ Յունիս 3-ին անոնք գործընկերներուն ներկայացուցին Ռուսիոյ պետական գրադարանի «ԱՊՀ գրադարաններու կրթական համագործակցութիւն» եւ «Գրադարանը բազմաբեւեռ աշխարհին մէջ» համառուսաստանեան 28-րդ գրադարանային քոնկրէսի աշխատանքներուն մասնակցութեան մասին իրենց հաշուետուութիւնը։

Իր ելոյթին մէջ Սարա Զօհրապեանը ներկայացուցած է «Տեղեկատուական արհեստագիտութիւնը գրադարանային ոլորտէն ներս. ինչպէս գրաւել երիտասարդ մասնագէտները»խորագրով զեկուցումը՝ Հայաստանի ազգային գրադարանի օրինակով։ Երիտասարդ գրադարանային մասնագէտները տպաւորուած էին Քազանի մէջ Թաթարստանի ազգային գրադարանի շէնքային պայմաններով, արհեստագիտական յագեցուածութեամբ։ Յատկանշական է, որ այդ գրադարանին շէնքը կառուցուած է հայկական տուֆով։

Մասնակցութիւնը նման նախագիծերուն լաւ դպրոց մըն է երիտասարդ գրադարանավարներուն համար՝ խորացնելու իրենց գիտելիքները եւ կապեր հաստատելու միջազգային գործընկերներու հետ։