Ազգային գրադարանային շաբաթի շրջանակում Հայաստանի ազգային գրադարանի գիտական գծով փոխտնօրեն Հայկանուշ Ղազարյանը ներկայացրեց ՀԱԳ առցանց շտեմարանները։ Թվային, թվածին բովանդակության այս դարաշրջանում անհերքելի է էլեկտրոնային շտեմարաների դերը: Հայաստանի ազգային գրադարանի առցանց շտեմարանները վիրտուալ այդ աշխարհի անքակտելի մասն են, որոնցից ամենօրյա, ամենժամյա ռեժիմով օգտվում են, թե՛ ուսանողներն ու դասախոսնեը, թե՛ հասարակագետներն ու լրագրողները, գրադարանավարներն ու հետազոտողները:

Փոխտնօրեն Հայկանուշ Ղազարյանը հանգամանալից ներկայացրեց Ազգային գրադարանի շտեմարանները, ենթաշտեմարաններն ու ենթաենթաշտեմարանները, դրանցից օգտվելու նրբություններն ու դրանց ընձեռած հնարավորությունները: Հայ գիրք, Հայ մամուլ, ՀԱԳ թվային պահոց (ՀԱԳ հրատարակություններ, Ատենախոսություններ և սեղմագրեր, Հայագիտական՝ Արմենիկա հավաքածու, Ատենախոսություններ և սեղմագրեր, Արցախի (Լեռնային Ղարաբաղ) վտանգված ժառանգությունը, Միջազգային ԶԼՄ-ները Արցախի մասին, Ոչ գրքային հրատարակություններ): Ազգային գրադարանի շտեմարանների ու ենթաշտեմարանների թվարկումն արդեն իսկ պատկերացում է տալիս՝ ինչ քանակի ու ծավալի առացանց նյութի մասին է խոսքը:

Ինչպես այս ամենը ներկայացնելով նշեց գրադարանի փոխտնօրենը՝ դրանցից ամեն մեկն ունի իր ենթա-ենթա-ենթա շտեմարանները, որոնք ուսումնասիրելիս նորանոր աղբյուրներ են բացվում յուրաքանչյուր հետազոտողի համար: ՀԱԳ էլեկտրոնային պահոցն ամբողջությամբ՝ մի անփոխարինելի գործիք է առհասարակ գիտական աշխատանքով զբաղվողների համար։ Հիշեցենք, որ Ազգային գրադարանն անշեղորեն ընթանում է էլեկտրոնային նյութի նշաճանաչման ուղղությամբ, արդեն իսկ որոշակի ծավալ նշաճանչվել է, ինչն էականորեն հեշտացնում է փնտրման գործը: