Երգիծաբան Յակոբ Պարոնեանը 32 անուն պարունակող իր «Ազգային ջոջեր» երկին մէջ Յովհաննէս Տէրոյենցին յատկացուցած է պատուաւոր՝ չորրորդ տեղը՝ զինք դասելով 19-րդ դարու հայ ազգային ու մտաւոր կեանքի ամէնէն ազդեցիկ գործիչներու շարքին։ Այս գնահատականը լաւագոյնս կը բնութագրէ այն հեղինակութիւնն ու վաստակը, որ Տէրոյենցը ձեռք ձգած էր իր ժամանակակիցներու շրջանին՝ որպէս մտաւորական, բանասէր, թարգմանիչ, մանկավարժ, խմբագիր եւ աստուածաբան։ Հայաստանի ազգային գրադարանի Մատենագիտութեան եւ գրադարանագիտութեան բաժնի նախաձեռնութեամբ, յունիս 24-ին, բաժնի ընթերցասրահին մէջ տեղի ունեցաւ Յովհաննէս Պրուսացի Տէր Կարապետեան Տէրոյենցի ծննդեան 225-ամեակին նուիրուած գրականութեան ցուցադրութիւն-զեկոյցը։ Միջոցառման ընթացքին բաժնի վարիչ Անահիտ Նալպանտեանը ներկայացուց գրադարանի հաւաքածոներուն մէջ պահուող Տէրոյենցի աշխատութիւնները, անոր խմբագրած պարբերականները, թարգմանութիւնները, ինչպէս նաեւ անոր կեանքի ու բազմակողմանի գործունէութեան առնչուող հրատարակութիւններն ու ուսումնասիրութիւնները։ Յովհաննէս Տէրոյենցը ծնած է 1801 թուականին Պրուսայի մէջ։

Ստանալով հիմնաւոր կրթութիւն եւ տիրապետելով շարք մը լեզուներու (ցանկը՝ մեկնաբանութիւններուն մէջ)՝ ան նշանակալի դեր ունեցած է հայ մշակութային, կրթական եւ եկեղեցական կեանքի զարգացման գործին մէջ։ Ղեկավարած է Սկիւտարի ճեմարանը, զբաղած է թարգմանչական ու հրատարակչական գործունէութեամբ, խմբագրած Կոստանդնուպոլսոյ առաջին հայկական պարբերականներէն մէկը, հրատարակած է «Զօհալ» եւ «Երեւակ» հանդէսները, ինչպէս նաեւ ստեղծած է եկեղեցապատմական եւ աստուածաբանական արժէքաւոր աշխատութիւններ։ Ցուցադրութիւն-զեկոյցը հնարաւորութիւն տուաւ ներկաներուն ծանօթանալու Տէրոյենցի հարուստ ժառանգութեան եւ արժեւորելու անոր բացառիկ ներդրումը հայ գրականութեան եւ մշակոյթի պատմութեան մէջ։